Бројот на Украинци кои сакаат нивната земја да влезе во Европската унија достигна рекордни 91 отсто до крајот на март, но поддршката за членство во НАТО е намалена, покажуваат најновите податоци на агенцијата Рејтинг, пренесува Ројтерс.
Поддршката за членство во ЕУ главно се движеше околу 60 отсто во последните три години, но почна нагло да расте откако Русија ја нападна Украина на 24 февруари, според Рејтинг, водечкото независно истражување на јавното мислење во Украина.
Инвазијата – најголемиот напад врз европска земја од Втората светска војна – ја поттикна Украина да поднесе барање за брзо членство во ЕУ, а земјите од ЕУ воведоа сеопфатни санкции кон Русија и ги поздравија бегалците кои бегаат од војната.
Во рејтингот беше наведено дека со почетокот на војната се зголеми и поддршката за влез на Украина во НАТО, но оттогаш таа се врати речиси на предвоеното ниво од околу 68 проценти.
Западната воена алијанса испрати противтенковско и друго оружје во Украина по инвазијата, но не и војници. Одбиени се и повиците на Киев за воведување меѓународна зона на забранети летови за заштита на Украина.
Москва се противи на влезот на Украина во НАТО. Украинските преговарачи сигнализираа дека Украина е подготвена да се откаже од пристапувањето во Алијансата и да усвои неутрален статус во замена за безбедносни гаранции како начин да се постигне договор со Русија за завршување на војната.
Во истражувањето учествувале 1.500 возрасни лица ширум Украина, но не и во Крим, анектиран од Русија и во источните области контролирани од руските сепаратисти.