Администрацијата на Доналд Трамп планира да ги врати Американците на Месечината во следните пет години, изјави американскиот потпретседател Мајк Пенс.
Во говорот во Американскиот вселенски и ракетен центар во Хантсвил, Пенс оценил дека 2028 година, кога се предвидува следното слетување на Американците на Месечината, „не е доволно добра“.
Пенс рекол дека Американците „по секоја цена“ повторно ќе слетаат на Месечината во следните пет години.
– Некои ќе речат дека е претешко, дека е премногу ризично, дека е прескапо, но исто така беше и во 1962, рекол Пенс.
Како што пренесува Ројтерс, предизвикот на Пенс го прифатиле највисоките американски претставници на вселенската агенција НАСА.
– Денес сме во вселенската трка, како што бевме и во шеесеттите години, изјавил Пенс на состанокот со Националниот совет за вселена во Хантсвил, Алабама.
НАСА претходно соопшти дека планира повторно да испрати астронаути на Месечината до 2028 година.