Рускиот претседател Владимир Путин на севернокорејскиот лидер Ким Џонг Ун му подари автомобил од руско производство, објавија државните медиуми во Пјонгјанг.
Подарокот, како дел од зајакнувањето на врските меѓу двете земји, најверојатно е во спротивност со санкциите на ОН наметнати на Пјонгјанг во 2017 година.
Резолуцијата за санкции ја потпиша и Русија, а тие меѓу другото се однесуваат и на забраната за увоз на возила во Северна Кореја.
Путин „му подари на Ким Џонг Ун автомобил од руско производство за негова лична употреба“, објави севернокорејската новинска агенција КЦНА.
Сестрата на Ким, Џо Јонг, рече дека подарокот е „јасен приказ на посебниот личен однос“ меѓу врвните лидери на двете земји, додаде KCNA, која не прецизираше кој модел на возило е даден.
По посетата на севернокорејскиот лидер на Русија минатата година, Пјонгјанг се приближи до Москва.
Група руски туристи пристигнаа претходно овој месец на четиридневно патување, прва групна посета од странство откако Северна Кореја ги затвори своите граници поради пандемијата на коронавирус.
По септемврискиот самит меѓу Ким и Путин на рускиот Далечен Исток, САД и Јужна Кореја постојано рекоа дека Северна Кореја ѝ доставила оружје на Русија за употреба во војната со Украина, во замена за руска помош со севернокорејските сателитски програми.
Ким е познат и по неговиот интерес за луксузни автомобили. За време на посетата на севернокорејскиот лидер на Русија минатата година, Путин го покани да се прошета на задното седиште во неговата претседателска лимузина Аурус Сенат.
Севернокорејскиот лидер пристигна во Русија тогаш со својата лимузина, транспортирана со специјален воз од Северна Кореја.
Сите информации поврзани со најновите случувања во Северна Кореја можете да ги прочитате ТУКА.