Генералниот секретар на Обединетите нации, Антонио Гутереш денеска го критикуваше „хроничниот недостаток на помош“ ширум светот, бидејќи хуманитарните потреби продолжуваат да се зголемуваат.
Гутереш, пред Одделот за хуманитарни прашања на Економско-социјалниот совет на ОН, истакна дека постојаното недоволно финансирање и рекордното ниво на хуманитарни потреби го доведуваат системот до точка на кршење.
Гутереш изјави дека само 20 отсто од средствата што ги бара ОН како дел од глобалните хуманитарни потреби биле собрани во средината на оваа година.
„Без решение на финансиската криза, понатамошните дополнителни кратења се неизбежни“, предупреди Гутереш, пренесе Ројтерс.
Меѓународните донатори ветија околу 1,5 милијарди долари помош за Судан во понеделникот.
Пред конференцијата, апелот на ОН за хуманитарна поддршка во Судан од 2,57 милијарди долари беше финансиран со околу 17 проценти оваа година, а апелот за помош од речиси 500 милиони долари за бегалците од таа земја беше финансиран со 15 проценти.