Повеќе пари за спортот, и формирање на младински и училишни спортски лиги, се само дел од мерките кои денеска ги најави кандидатот за пратеник од Движење ЗНАМ – За наша Македонија Андреја Маџовски.
Како што рече Маџовски статистиката за здравјето на населението во Македонија е поразителна и тоа мора да се менува.
– 20 отсто од машките и 15 отсто од женските деца имаат преголема телесна тежина. 62 отсто од мажите и 58 отсто од жените над 18 години се со зголемена телесна тежина. Алармантно е зголемен бројот и на лица заболени и дијабетес и кардиоваскуларни заболувања. Нездравиот живот и начин на исхрана е ширико распространет меѓу младите. Ние од Движење ЗНАМ – За наша Македонија спремни сме да понудиме решенија и визија за надминување на постоечката состојба, рече тој.
Маџовски најави зголемување на опфат на ученици од основни и средни училишта во повеќе спортско рекреативни активности и формирање младински лиги и училишен спорт, „со цел младите спортисти уште во школските денови да имаат можност преку спортски систем да ги афримираат своите вештини и да градат спортски дух“.
– Ќе предложиме законски измени со цел обезбедување финансиски средства за подобро функционирање на овие школски и младински лиги. Наставниот кадар, наставниците, педагозите, психолозите и спортските тренери да имаат можност за надоградување на сопствени вештини преку користење на европски фондови и програма со цел истите да се пренесат на нашите најмили, додаде Маџовски.
Според кандидатот за претник на ЗНАМ, „наредниот период ќе биде приоритетен за градење соодветен спортски систем, стратешки дефиниран од повеќе аспекти и опредлеби за децата од најрана возраст.“
Тој најави субвенции од државата за поголемо учество на децата во спортски вештини и активоности, но и градење и реновирање на постоечката спортска инфраструктура.
– Ќе се бориме за зголемена институционална поддршка на професионалните спортисти во сите спортови. Ќе предложиме законски решенија и измена на постоечкиот ваучерски систем кој сега неправилно функционира, да биде донесен закон каде ќе постои јасна методологија и определени рокови за сите спортски федерации и спортски клубови да добиваат средства за финансирање и функционирање на нивните активности. Воведување на наставно-едукативни програми за промоција на здрави навики, здрав живот и правилна исхрана, изјави Маџовски.
Една од целите на ЗНАМ, како што истакна Маџовски, ќе биде и формирање на Министерство за спорт и култура, “со цел поголема отчетност и контрола на работењето на федерациите и агенциите, зголемување на средства од државата за младински и на врвниот спорт и млади спортски таленти кои преку овој систем ќе дадат врвни спортски резултати“.
Никола Ивановски