Украинскиот претседател Володимир Зеленски треба да се обрати попладнево на почетокот на видео конференцијата на лидерите на Г7, објави портпаролот на јапонската влада Хироказу Мацуно.
Вчера, Зеленски неочекувано го откажа видео-обраќањето во американскиот Конгрес, каде што се водат тензични преговори за новата американска помош за Украина во борбата против Русија.
Со денешната видео конференција ќе претседава Фумио Кишида, премиер на Јапонија, кој е овогодишен претседавач на Г7, групата на најбогатите либерални економии.
Зеленски ќе зборува на почетокот на средбата, која треба да започне во 15:30 часот по средноевропско време.
На видео состанокот, лидерите на Г7 треба да разговараат за важни теми за меѓународната заедница, како што е ситуацијата во Украина и на Блискиот Исток, како и за вештачката интелигенција, изјави портпаролот на јапонската влада.
Ќе разговараат и за поддршката за земјите во развој.
Демократите и републиканците се расправаа вчера на состанокот на американскиот Конгрес посветен на Украина, а во центарот на дискусијата беше новиот пакет помош за Киев.
САД се најважниот снабдувач на воена помош за Киев, давајќи десетици милијарди долари од почетокот на руската инвазија на земјата во февруари 2022 година.
Но, ветувањето на претседателот Џо Бајден дека ќе продолжи со таа поддршка е под сериозна закана поради големите поделби во американскиот Конгрес по ова прашање.
Руско-украинскиот конфликт се претвори во војна на трошење. Киев не успеа значително да ги пробие цврстите одбранбени линии на Русија на југот и на истокот на земјата во последните месеци.
И на почетокот на ноември, министрите за надворешни работи на Г7 собрани во Токио дадоа гаранции дека поддршката на нивните земји за Украина никогаш нема да ослабне.
Сите информации поврзани со најновите случувања со војната во Украина можете да ги прочитате ТУКА.