Претседателот на руската Државна дума, Вјачеслав Володин денеска изјави дека Обединетите нации треба да го разгледаат прашањето за обештетување на народите на африканскиот континент од страна на САД, Велика Британија и Франција, за штетите што ги предизвикаа за време на колонијализмот.
„САД, Велика Британија и Франција мора да ја надоместат штетата на африканските земји. Во периодот на колонијализмот, Соединетите Американски Држави и гореспоменатите европски земји, кои се занимаваа со трговија со робови, само во Америка превезоа околу 15 милиони луѓе, кои беа претворени во робови“, напиша тој на својот канал Телеграм, пренесува Риа Новости.
Како што наведе, само Британија превезла три милиони робови преку Атлантскиот Океан во 16. и 19. век, а историчарите го нарекуваат „можеби најгрозоморното злосторство во целата нејзина историја“.
Володин рече дека колонијалните интереси на Соединетите Американски Држави и голем број западни земји не исчезнале, туку само методите се менуваат.
„Африканските наоѓалишта на злато, платина, ураниум, критични минерали и метали од ретки земји продолжуваат да бидат опустошени. Африканските земји се само извор на суровини за нив“, рече тој.
Според него, поморските пристаништа и многу рударски компании се во сопственост на неоколонизатори, а законодавството на многу африкански земји во областа на екстракција на природни ресурси сè уште не е ослободено од остатоците од колонијалниот систем, пренесува Танјуг.
„Поради неоколонијалното влијание на западните земји, многу африкански земји имаа нула или негативен економски раст во текот на нивното 60-годишно постоење. Ова води кон сиромаштија и губење на суверенитетот“, рече претседателот на Државната дума.