Се очекува парламентот на Јужна Кореја денеска да гласа за закон со кој постепено ќе се укине потрошувачката и продажбата на кучешко месо.
Јадењето кучешко месо порано беше вообичаено во Јужна Кореја, но денес тоа е ретко и ограничено на некои постари луѓе, според Ројтерс.
Поддршката за забраната за кучешко месо се зголеми за време на мандатот на јужнокорејскиот претседател Јун Сук-Јол, кој посвои голем број кучиња и мачки.
Предлог-законот, претставен од владејачката партија, вчера беше усвоен од собраниската комисија за земјоделство, пред денешното гласање во собранието, кое има 300 пратеници.
Доколку биде усвоен, законот ќе стапи на сила за три години, давајќи им време на земјоделците и сопствениците на ресторани да најдат алтернативни извори на вработување и приходи.
Прекршувањето на законот ќе се казнува со затвор до три години или парична казна од 22.900 долари.
Според истражувањето објавено во понеделникот, повеќе од 94 отсто од испитаниците рекле дека никогаш не јаделе кучешко месо, а околу 93 отсто рекле дека нема да го прават тоа во иднина.
Претходните напори за забрана на консумирање кучешко месо во Јужна Кореја пропаднаа.
Група од околу 200 одгледувачи на кучиња во ноември одржаа протести во близина на претседателската канцеларија, барајќи да не се усвои законот за забрана за консумирање кучешко месо.
Министерството за земјоделство на Јужна Кореја проценува дека од април 2022 година, околу 1.100 фарми одгледувале 570.000 кучиња за да служат околу 1.600 ресторани.
Одгледувачите и продавачите рекоа дека забраната ќе влијае на 3.500 фарми кои одгледуваат 1,5 милиони кучиња, како и на 3.000 ресторани.