Украина планира да испрати „неколку десетици“ борбени пилоти на обука за летање со американски борбени авиони Ф-16, изјави во петокот портпаролот на украинските воздухопловни сили Јуриј Ихнат, додека западните сојузници ги подготвуваат потребните програми за обука.
„Се прави сè за да започне што е можно поскоро“, изјави Ихнат за украинската национална телевизија, додавајќи дека пилотите избрани за обуката ќе имаат борбено искуство.
„Тоа не е тренинг, тоа е преквалификација“, рече Ихнат.
Украина, која ја започна долгоочекуваната контраофанзива, постојано повторува дека ѝ се потребни нови западни авиони за успешно да се спротивстави на руската воздушна доминација.
Членките на НАТО, Холандија и Данска ги предводат напорите на меѓународната коалиција за обука на пилоти и персонал за поддршка, одржување на авионите и на крајот снабдување со Ф-16 на Украина.
Холандската министерка за одбрана Кајса Олонгрен оваа недела изјави за Ројтерс дека обуката на украинските пилоти за летање со Ф-16 може да започне уште ова лето.
Таа рече дека целта ќе биде програмата за обука да биде целосно оперативна во рок од шест месеци.
Данска, каде што има симулатори за летање, е можна локација за програмата.
Сè уште не е донесена конечна одлука за барањето на Киев за испорака на десетици авиони Ф-16, рече Олонгрен.
Програмата за обука поддржана од САД ќе ги вклучи Белгија и Луксембург, додека Франција и Британија се понудија да помогнат, рече таа.
Сите информации поврзани со најновите случувања со војната во Украина можете да ги прочитате ТУКА.