Пристапувањето на Украина во Европската унија ќе донесе повеќе придобивки отколку трошоци, а земјите-членки на ЕУ треба да ги одобрат следните формални чекори за почеток на преговорите кон крајот на оваа недела, изјави премиерот Денис Шмихал, пренесува Танјуг.
„Чекаме и сакаме да добиеме одобрение од Советот на Европа оваа недела и веруваме дека можеме да ги започнеме преговорите за пристап во првата половина на оваа година“, истакна Шмихал за Еурактив.
Неговите коментари дојдоа откако Европската комисија минатата недела испрати нацрт-преговарачка рамка за разговорите Украина – Молдавија до земјите-членки, по одлуката на водачите на ЕУ во декември.
Неодамнешниот извештај на истражувачкиот центар Бригел, како и внатрешните документи на ЕУ што ги виде Еурактив, проценуваат дека финансиските трошоци за пристапувањето на Украина се меѓу 110 и 136 милијарди евра за седумгодишниот буџет на ЕУ, приближно помеѓу 0,10 и 0,13 отсто од БДП на блокот.
Подготвеност на Украина да спроведе реформи
„Ги видовме извештаите, но украинскиот пазар, украинските одбранбени сили, украинските суровини и критичните материјали и другите сектори можат да донесат многу повеќе во однос на безбедносната и економската корист“, рече украинскиот премиер.
Тој ја истакна подготвеноста на Украина да ги спроведе неопходните реформи во рамковен период од две години.
Зборувајќи за тоа што Украина ќе донесе на маса како идна членка на ЕУ, Шмихал истакна пет сектори, вклучувајќи одбрана, енергија, земјоделство, суровини и дигитален сектор и изјави дека земјата во моментов има една од најсилните армии во светот. со искуство на бојно поле.
Тој нагласи дека Украина има подземни складишта за гас и моментално располага со 33 милијарди кубни метри, кои многу европски компании веќе ги користат и дека капацитетот може да се зголеми за 10 до 15 милијарди кубни метри.
Шмихал рече дека Киев е способен да обезбеди поголема стабилност на глобалниот пазар на храна, а со Украина како членка, ЕУ може да биде „силен геополитички играч“ кога станува збор за стабилноста и безбедноста на храната во светот.
Украина поседува клучни суровини
Еурактив наведува дека Украина располага со пет проценти од светските суровини и природни ресурси, вклучувајќи 22 од 30 критични суровини клучни за европското производство, како што се литиум, кобалт и титаниум.
Украинскиот премиер ја отфрли загриженоста дека некои земји-членки на ЕУ би можеле да сакаат да го забават напредокот на Киев кон пристапување во блокот поради актуелната загриженост поради наводните нефер трговски практики.
„Немаме намера да создаваме нелојална конкуренција со нашите соседи, европските земји и европските земјоделци“, заклучи Шмихал.
Тој особено ја истакна важноста на победата на Украина над Русија, бидејќи таа „го зачувува единството на ЕУ, во Украина и во земјите-членки на ЕУ“, што, како што наведува, рускиот претседател Владимир Путин има за цел да го поткопа.