Генералниот секретар на Обединетите нации (ОН) Антонио Гутереш остро го осуди насилството на Израел и неговата прекумерна употреба на сила во градот Џенин на окупираниот Западен Брег.
„Израелските воздушни напади и копнените операции во бегалскиот камп беа најлошото насилство на Западниот Брег во многу години, со значително влијание врз цивилите, вклучително и повеќе од 100 повредени и илјадници принудени да избегаат“, изјави Гутереш за новинарите во седиштето на ОН во Њу. Јорк.
Гутереш рече дека силно ги осудува сите акти на насилство врз цивилите, вклучително и терористичките акти.
„Ова се однесува на секоја употреба на прекумерна сила. И очигледно е дека во оваа ситуација имаше прекумерна употреба на сила од страна на израелските сили“, рече тој на прашањето на новинарот на Анадолу дали ова конкретно се однесува на Израел.
Почитување на меѓународното право
Гутереш го повика Израел да се придржува до своите обврски според меѓународното право, вклучително и должноста за воздржување и употреба на пропорционална сила, како и обврската да се минимизираат штетите и повредите и да се почитува и зачува животот.
„Употребата на воздушни напади не е во согласност со спроведувањето на операциите за спроведување на законот“, рече тој.
Гутереш рече дека Израел, како окупаторска сила, има одговорност да го заштити цивилното население.
Тој рече дека ја разбира загриженоста на Израел за безбедноста, но рече дека ескалацијата не е решение.
„Заштита на цивилите“
„Тоа едноставно ја поттикнува радикализацијата и води кон продлабочување на циклусот на насилство и крвопролевање“, рече првиот човек на ОН.
Гутереш рече дека не е „реално“ да се испрати воена сила во Израел.
„Мислам дека израелската влада не би се согласила на таа можност, но мислам дека треба да најдеме механизми кои ќе овозможат заштита на цивилите во овие драматични околности“, додаде тој.
Израелската армија вчераутро се повлече од Џенин, со што ја заврши најголемата воена операција во градот во последните 20 години.
Во нападите загинаа најмалку 12 Палестинци, меѓу кои пет деца, а повеќе од 140 се ранети. Направена е голема штета во градот.