На каналот на Телеграм поврзан со Вагнер, беше објавено видео на кое наводно се гледа водачот на оваа платеничка група Евгениј Пригожин во Белорусија.
Пригожин, според Би-Би-Си, бил виден како ги пречекува борците и ги опишува неодамнешните настани на линијата на фронтот во Украина како „срамни“.
Тој, исто така, навестува дека Вагнер може повторно да се приклучи на војната во одреден момент.
Видеото, исто така, ја потврдува изјавата на Белорусија дека борците на Вагнер сега дејствуваат како воени инструктори за војската на земјата.
Доколку се потврди автентичноста, пишува Би-Би-Си, ова ќе биде прва снимка на Пригожин откако Вагнер го покрена вооружениот бунт во Русија на крајот на јуни.
Фотографиран при слаба осветленост, Пригожин стои на асфалтна патека во поле, опкружен со дрвја и што изгледаат како магацини и шатори.
BBC Verify е уверен дека распоредот на шаторите, дрвјата и зградите одговара на локацијата на западниот раб на кампот.
Во позадина се гледаат бројни луѓе во камуфлажа, а се слуша и навивање.
И покрај слабата осветленост, Пригожин е препознатлив по силуетата, а говорителите на рускиот јазик, запознаени со неговите претходни изјави, за Би-Би-Си велат дека гласот и начинот на зборување несомнено се негови.
Во видеото, Пригожин вели дека борците „достојно се бореле“ во Украина и дека „направиле многу“ за Русија и силно го критикува моменталното водење на војната.
„Она што се случува на првата линија во моментов е срам во кој не сакаме да учествуваме и треба да почекаме да ја покажеме нашата храброст во целост“, се слуша како вели тој.
Тој понатаму вели дека „донесена е одлука да остане тука во Белорусија некое време“ и дека Вагнер ќе го искористи времето за да ја направи белоруската армија „втората армија во светот“.
Шефот на Вагнер, исто така, навестува дека неговите борци „ќе продолжат да се подготвуваат“ и дека на крајот ќе се вратат на првите борбени линии во Украина „кога ќе бидеме сигурни дека нема да бидеме принудени да се засрамиме себеси и нашето искуство“.
Сите информации поврзани со најновите случувања со војната во Украина можете да ги прочитате ТУКА.