Половина година измина од стартот на реконструкцијата на мостот на влезот од кумановската населба Перо Чичо.
Со стартот на градежните зафати, беше воведен и посебен сообраќаен режим со цел непречено да се работи на надвозникот и истовремено да се одвива сообраќајот со наизменично пропуштање на возила регулирано со семафори.
Во мејлот кој тогаш беше испратен од страна на претставник на компанијата „Х.Ф.Вибе и ДООЕЛ“ кои се изведувачи на градежните работи, беше наведено дека реконструкцијата треба да заврши во ноември 2019 година.
– Во рамките на програмата за информирање на засегнати страни во реализацијата на проектот би сакале да Ве информираме дека во наредниот период, односно до средината на ноември 2019 година, фирмата Х.Ф.Вибе и ДООЕЛ ќе извршува градежни работи во врска со реконструкција и рехабилитација на железнички премини на железничката пруга Куманово – Бељаковце, како дел од проектот за Рехабилитација на Железничкиот Коридор 8. Во конкретниот случај, станува збор за пообемен градежен зафат за реконструкција и рехабилитација на постоечкиот железнички подвозник и изградба на нов патен надвозник на ул.Ѓорче Петров, населба Баново трло, пишува во соопштението на компанијата од 2ри јули 2019 година.
Денеска половина година подоцна, реконструкцијата на мостот не е завршена, посебниот сообраќаен режим се уште трае, а тоа создава и метеж во сообраќајот и нервоза кај возачите.
Одговор уште вчера нашата редакција побара од претставникот на компанијата „Х.Ф.Вибе и ДООЕЛ“, но оттаму никој не одговори кога се очекува да заврши реконструкцијата на надвозникот.
Се обидовме прашањето да го адресираме и преку СМС порака, но повторно до објавување на овој текст не добивме повратен одговор.
Никола Ивановски