На европските берзи утринава паднаа цените на акциите бидејќи централните банки во светот ќе продолжат да ги зголемуваат каматните стапки поради високата инфлација, што ќе го забави растот на економиите.
Индексот STOXX 600 на водечките европски акции во 9 часот и 30 минути беше во минус за 0,4 отсто, слабеејќи втор ден по ред.
Истовремено, лондонскиот FTSE индекс ослабе за 0,64 отсто, на 7.926 поени, додека франкфуртски DAX се лизна за 0,33 отсто, на 15.346 поени, а париски CAC за 0,39 отсто, на 7.280 поени.
Цените на акциите паднаа и на азиските берзи. Индексот MSCI на азиско-пацифичкиот регион, со исклучок на Јапонија, беше намален за 1 процент околу 9:30 часот, спуштајќи се на најниското ниво од 6 јануари.
Истовремено, индексот Никеи се лизна за 1,4 отсто на Токиската берза, додека цените на акциите во Австралија, Хонг Конг, Шангај и Јужна Кореја паднаа меѓу 0,2 и 1,7 отсто.
Централните банки ги зголемуваат каматните стапки
По силниот раст во јануари, благодарение на надежите на инвеститорите за забрзување на растот на кинеската економија, азискиот индекс MSCI значително падна во февруари.
Тоа најмногу е последица на натамошното зголемување на каматните стапки од страна на централните банки, со оглед на тоа што инфлацијата и натаму е висока.
Вчера, записникот од неодамнешната седница на шефот на австралиската централна банка покажа дека се подготвува ново поскапување на парите, а утринава централната банка на Нов Зеланд ја зголеми основната каматна стапка за 0,50 процентни поени, на 4,75 отсто, највисоко ниво во последните 14 години.
И бидејќи се очекува дополнително зголемување на каматните стапки од страна на американската централна банка, вчера на Волстрит цените на акциите забележаа најголем дневен пад оваа година. Dow Jones се лизна за 2,06 отсто, додека S&P 500 потона 2, а Nasdaq индексот 2,5 отсто.
Падот на индексот уследи по најавата дека, според податоците на S&P, деловната активност во САД неочекувано зајакна во февруари. Индексот на активност скокна од 46,8 поени, колку што беше еден месец претходно, на 50,2 поени.
Ова, како и низата неодамнешни макроекономски податоци, покажуваат дека економијата е многу отпорна на агресивно зголемување на каматните стапки од страна на американската централна банка.
Дали ФЕД ќе продолжи да ги зголемува каматните стапки?
И бидејќи економијата продолжува да расте солидно, како и пазарот на труд, инфлациските притисоци би можеле да останат зголемени подолг период од очекувањата на пазарот.
Поради оваа причина, се проценува дека ФЕД ќе ги зголеми каматните стапки уште најмалку два или три пати и ќе ги зголеми на 5,35 отсто до јули.
Дополнително, до неодамна инвеститорите се надеваа дека ФЕД може да започне со намалување на каматните стапки на крајот на оваа година, доколку инфлацијата доволно се смири, но се чини дека каматните стапки ќе останат покачени подолг период од очекувањата на пазарот.
„По овие податоци, инвеститорите сфатија дека ФЕД не се шегува кога вели дека ќе ги зголеми каматните стапки повеќе отколку што очекува пазарот и дека ќе остане на тие нивоа подолго од очекуваното“, рече Керол Шлајф, директор на BMO Family.