Следната рунда преговори меѓу руската и украинската делегација ќе се одржи во вторник во Истанбул, соопшти турското претседателство.
Портпаролот на турското претседателство Ибрахим Калин изјави за Си-Ен-Ен дека разговорите ќе се одржат во вторник.
Од кабинетот на турскиот претседател претходно беше соопштено дека Реџеп Таип Ердоган и рускиот претседател Владимир Путин се договориле следната рунда преговори меѓу делегациите на Русија и Украина да се организира во Истанбул, но не беше прецизирано кога.
Главниот руски преговарач Владимир Медински претходно изјави дека страните се договориле да се сретнат и најави дека тоа ќе се случи во вторник и среда.
Меѓутоа, украинскиот пратеник и член на преговарачкиот тим Давид Арахамија претходно на Фејсбук изјави дека следната рунда разговори лице в лице меѓу Украина и Русија ќе се одржи во Турција од понеделник до среда, пишува Укринформ.