Војната во Украина влезе во 739-от ден. Украинските власти најавуваат дека руските сили извршиле уште еден напад со дронови врз Одеса во текот на ноќта и дека најмалку две лица загинале.
Од друга страна, службениците на ФСБ тврдат дека пронашле експлозивна направа во автомобил кој се обидувал да влезе на Крим.
Најмалку две лица загинаа во напад на руски дрон врз Одеса, соопштија локалните власти.
Украинската армија навела дека руската страна ја нападнала Одеса со осум дронови, и дека биле уништени седум беспилотни летала, но еден погодил станбен дел.
Повеќе луѓе се под урнатините, додека најмалку седум лица се повредени, според украинските власти.
Импровизирана експлозивна направа, направена од компоненти од странско производство, била пронајдена во автомобил кој се обидел да влезе во Крим преку контролниот пункт Џанкој, изјавија за РИА Новости регионалните безбедносни сили.
Контролниот пункт Џанкој се наоѓа на северот на Крим, на границата со украинската област Херсон, чија анексија беше објавена од Русија во септември 2022 година.
„Полицајците на ФСБ, при контрола на автомобил кој се движел кон територијата на Република Крим, управуван од полициски службеник од областа Херсон, откриле предмет сличен на експлозивна направа, кој бил прикачен под возачкото седиште“, вели соговорникот на агенцијата.
Изворот тврди дека експертите утврдиле дека бомбата била изработена од компоненти од странско производство и доставени до Украина од земјите на НАТО.
Истрагата е во тек, наведува руската агенција, а бомбата е деактивирана.
На 29 февруари ФСБ објави дека на Крим биле приведени маж и жена кои наводно подготвувале терористички напади по налог на Украина.
Сите информации поврзани со најновите случувања со војната во Украина можете да ги прочитате ТУКА.