Белорускиот претседател Александар Лукашенко најави дека ќе се кандидира за претседател следната година, а најавата дојде на денот на парламентарните избори кои опозицијата во егзил ги опиша како лажни по долгогодишна репресија.
По неговиот реизбор за претседател во 2020 година, Лукашенко ги задуши опозициските протести, чии многу членови беа уапсени или ја напуштија земјата.
„Кажете им на сите дека ќе се кандидирам“ во 2025 година, изјави Лукашенко по гласањето на парламентарните избори, пренесе Бета, повикувајќи се на АФП.
Лукашенко е на чело на државата од 1994 година, а никој од опозицијата не можеше да учествува на парламентарните избори.
Опозицијата од странство го повика населението да го бојкотира гласањето.
Лидерката на опозицијата во егзил Светлана Тихановскаја, чиј сопруг е во затвор, гласањето го нарече лажни избори.
„Повеќе од 1.400 политички затвореници“
„Обидот на режимот да ги искористи овие лажни избори за да се легитимира е осуден на неуспех“, рече Тихановска.
Американските власти оценија и дека парламентарните избори во Белорусија се „лажни“.
„Невозможно е да се одржи слободно и фер гласање во клима на страв и со повеќе од 1.400 политички затвореници“, рече портпаролот на Стејт департментот Метју Милер.
Белорусија, која е под западни санкции, е главно изолирана на меѓународната политичка сцена.
Таа земја е главен сојузник на Русија и дури и ја отстапи својата територија во февруари 2022 година за да овозможи инвазија на Украина.
„Ние секогаш ќе бидеме со Русија“, рече Лукашенко, кој зависи од политичката и економската поддршка на Кремљ.