Кошаркарите на КК Куманово го загубија третиот меч од полуфиналниот дел од плејофот на домашната кошаркарска лига кога вчера на гостински терен беа совладани од Карпош Соколи со резултатот 74:65.
Кумановци на овој меч имаа лоша реализација од игра (18/61), што беше пресудно за вториот пораз во Скопје. Исто така, голем удел имаше „отсуството” на главните тројкаши, Александар Костоски и Марко Симоновски – првиот постигна две тројки од шест обиди и заврши со осум поени, додека Симоновски одигра меч за заборав со реализација 0/9 и ниту еден постигнат поен, но сигурно и фактот дека гостинот беше натскокан под обрачите, посебно во одбраната каде скоковите изразено беа во полза на К.Соколи (36-24). Дополнително, може да се земе предвид и за реализацијата на Бојан Трајковски, кој иако постигна 16 поени, само двапати поентираше за два од вкупно 12 обида.
„Соколите” одлично го отворија натпреварот и уште на стартот се одлепија двоцифрено (21-7). Домаќинот убедливата разлика ја изгради благодарение на одличните Соколов, Снер и Петровиќ кои „стрелаа” од секоја позиција, но исто така пресудна беше и лошата реализација на кумановци кои имаа реализација 3/10 од поле, и ниту една погодена тројка од вкупно четири обиди.
Во петтата минута тимот на К.Соколи дојде и до 23-от поен, но потоа следеа четири минути без постигнат кош, криза која противникот ја искористи и се доближи на 23-16. На стартот на вториот период избраниците на Матиќ ги искористија советите кои ги добија на паузата и повторно го вратија двоцифреното водство (32-20), а во средината дојдоа и до највисокото водство од 16 поени (40-24).
Голем минус во играта на кумановци беше отсуството на Александар Костоски, кој за 13 минути на паркетот не успеа ниту еднаш да реализира од игра (0/3) и да постигне само два поени, двата од слободни фрлања, а исто така тука беше и нерасположениот шутер Марко Симоновски кој шута пет тројки и не погоди ниту една. До полувремето поради неефикасниот шут на гостите домаќинот успеа да дојде и до водство од 19 поени (47-28).
На стартот на третиот период кумановци ја намалија разликата на 15 поени, со две тројки на Караџовски и Костоски, кои воедно беа и првите по онаа на Бојан Трајковски на стартот на мечот (53-38), која воедно беше идентична и по крајот на третиот период (59-44). Во последниот период славеше Куманово, но сепак, триумфот беше недоволен за топење на разликата која домаќинот ја изгради во првото полувреме.
Најефикасен кошаркар во победничкиот табор беше Болтиќ со 21 поени, а го следеа Снер со 15 и Петровиќ со 14 поени, додека кај Куманово најмногу се истакнаа Трајковски и Мандиќ со по 16 постигнати поени.
Четвртиот меч од полуфиналната серија од плејофот во Суперлигата се игра за најверојатно утре во Куманово.
