Претседателот Владимир Путин вчера изјави дека Русија не сака да „апсорбира никого“ и дека „непријателите“ сакаат да ја запрат руската интеграција со Белорусија, за време на посетата на Минск што ги поттикна стравувањата во Киев дека има намера да изврши притисок врз поранешниот советски сојузник да се приклучи на копнена офанзива што би отворило нов фронт против Украина.
Путин, чии војници беа одбиени на север, североисток и југ на Украина, сега е поактивен во јавноста за војната.
Како што потсетува Ројтерс, тој во петокот го посетил оперативниот штаб и разговарал со воените команданти.
Неговиот вчерашен разговор со белорускиот претседател Александар Лукашенко е негова прва посета на Минск од 2019 година – пред пандемијата на Ковид и бранот продемократски протести во 2020 година што Лукашенко ги задуши благодарение на силната поддршка од Кремљ.
На заедничката прес-конференција двајцата лидери зборуваа за предностите на соработката притоа едвај ја спомнаа војната во Украина, а ниту еден од присутните новинари не постави прашање на таа тема.
Наместо тоа, тие прашаа за блиската економска и одбранбена соработка меѓу двете земји, како и за финалето на фудбалското првенство во Катар.
Руските сили ја користеа Белорусија како лансирна рампа за напад врз украинскиот главен град Киев во февруари, а руските и белоруските воени активности се во тек во таа земја со месеци.
Белоруската опозиција ја гледа вчерашната посета и разговорите меѓу двајцата лидери како алатка за претстојната руска анексија.
„Русија не е заинтересирана да апсорбира никого“, рече Путин. „Тоа едноставно не е целисходно“, посочи тој.
Лукашенко, кој во еден момент за време на официјалната прес-конференција го нарече Путин „постар брат“, ја пофали Русија како пријател кој „ни подаде рака“ давајќи ѝ нафта и гас на Белорусија по ниски цени.
„Русија не може без нас, но ние не можеме ниту без Русија“, рече тој.
Портпаролот на Кремљ Дмитриј Песков претходно вчера изјави дека Белорусија е „сојузник број еден“ на Русија, но дека сугестиите дека Москва сака да изврши притисок врз Минск да се приклучи на „специјална воена операција се глупави и неосновани измислици“.
Генералот Серхи Најев од командата на украинските вооружени сили рече дека верува оти Путин и Лукашенко разговараат за „натамошна агресија врз Украина и пошироко вклучување на белоруските вооружени сили во операцијата против Украина, особено на копно“.
Началникот на украинскиот Генералштаб Валери Залужни изјави за „Економист“ минатата недела дека Русија подготвува 200.000 нови војници за голема офанзива што ќе дојде од исток, југ или дури и од Белорусија веќе во јануари, но поверојатно на пролет. .
Москва и Минск формираа заедничка воена единица во Белорусија и одржаа бројни вежби. Три руски воени авиони беа распоредени во Белорусија минатата недела.
Сепак, Лукашенко, кој во голема мера се потпира на Москва за поддршка, постојано повторува дека Белорусија нема да војува со Украина, а странските дипломати велат дека испраќањето белоруски војници во војна би било крајно непопуларен потег дома.
Западните санкции веќе ѝ го отежнаа на Белорусија извозот на вештачко ѓубриво, нејзината главна извозна стока, преку балтичките пристаништа.
Западните воени аналитичари тврдат дека малата армија на Лукашенко нема доволно сила или борбено искуство за да направи значителна разлика – но дека принудувањето на Украина да испрати војници на север ќе ја направи земјата поранлива на руските напади на друго место во земјата.
На 13 декември, Пентагон објави дека не гледа „никаков вид заканувачки прекугранични активности од страна на Белорусија во овој момент“.
Посетата на Путн на Минск беше најавена во петокот, откако рускиот министер за одбрана Сергеј Шојгу на 3 декември ненадејно отпатува во Белорусија, каде што потпиша документи со својот белоруски колега, чија содржина и детали не се објавени.
Ројтерс истакнува дека стравувањата од мрачни активности биле поттикнати од веста дека белорускиот министер за надворешни работи Владимир Макеи, еден од ретките функционери во владата на Лукашенко кој бил во контакт со Западот, ненадејно починал минатиот месец. Причината за неговата смрт не е соопштена.
Неговиот наследник Сергеј Алеиник вчера се сретна со рускиот министер за надворешни работи Сергеј Лавров.
На владиниот состанок по објавувањето на разговорите со Путин, Лукашенко одеднаш изјави дека секое предавање на суверенитетот би било предавство на белорускиот народ.
„Особено по овие големи преговори, сите ќе кажат: Тоа е тоа, нема повеќе влада во Белорусија, Русите веќе парадираат и владеат со земјата“, рече Лукашенко.
„Сакам повторно да го истакнам ова: Никој освен нас не управува со Белорусија“.
Артјом Шрајбман, белоруски политички аналитичар, изјави за Гардијан дека секое директно вклучување на Белорусија во Украина би претставувало политички ризик за Лукашенко.
„Учеството во оваа војна би било крајно непопуларно. Сите достапни истражувања покажаа дека 90 отсто од Белорусите не сакаат да ја испратат војската таму“, рече Шрајбман. „Ова ги вклучува поддржувачите на Лукашенко и проруските делови од општеството.
Сепак, Шрајбман предупреди дека иако Лукашенко ќе се обиде да се спротивстави, неговата позиција може да се промени во иднина.
„Досега Путин изгледа задоволен од се што му дал Лукашенко. Меѓутоа, ако побара од Лукашенко директно да учествува во војната, не можам да се обложувам дека ќе може да му се спротивставува на неодредено време.
Неколку часа пред Путин да пристигне во Белорусија, Русија во напад со беспилотно летало „камикази“ ја погоди клучната енергетска инфраструктура во Киев околу него.
Сите информации поврзани со најновите случувања со војната во Украина можете да ги прочитате ТУКА.