Спасувачите пронајдоа уште две тела на различни локации на индонезискиот вулкан Марапи, кој еруптираше изминатиот викенд, со што бројот на загинати се искачи на 13.
Потрагата по уште 10 планинари на планината Марапи продолжи во вторникот, откако претходно беше прекината бидејќи вулканот продолжи да исфрла пепел.
Три лица беа спасени во понеделникот.
Во моментот на ерупцијата во областа имало 75 планинари, но повеќето биле евакуирани.
Планината Марапи, еден од 127-те активни вулкани во Индонезија, во неделата исфрли пепел три километри во воздухот.
Властите воведоа второ највисоко ниво на тревога и им забранија на жителите да се движат во радиус од три километри од кратерот.
Во понеделникот од областа беа евакуирани 49 алпинисти, од кои многумина исто така се здобија со изгореници.
Тројцата спасени лица, кои беа пронајдени во близина на кратерот, се „исцрпени и имаа изгореници“, изјави Абдул Малик, шеф на Агенцијата за пребарување и спасување во Паданг.
На видеото од ерупцијата се гледа огромен облак од вулканска пепел како оди на небото, додека автомобилите и патиштата се прекриени со пепел.
Спасувачите наизменично ги носеа загинатите и повредените по тешкиот планински терен.
„Некои имаат тешки изгореници и се пренесени во болница“, изјави Руди Риналди, шеф на Агенцијата за ублажување на катастрофи на Западна Суматра.
Една од спасените планинари стенкаше од болка и рече „Господ е голем“ додека еден од спасувачите ја носеше во амбулантно возило, пренесе АФП.
Џоди Харијаван, портпаролка на локалниот тим за пребарување и спасување, им рече на новинарите дека би било „многу опасно“ да се продолжи со потрагата додека вулканот е сè уште активен.
Една од планинарите, Зафира Захрим Фебрина, во видео порака од вулканот ја молела мајка си за помош.
19-годишната студентка, чиј прекар е Ифе, се појавила шокирана, лицето изгорело, а косата испеана со густ сив пепел.
„Мамо, помогни ми“, рече таа.
Пешачела во Марапи со 18 соученици и сега е во болница на лекување.
Нејзината мајка Рани Раделани изјави за АФП дека нејзината ќерка претрпела „огромна траума“.
Планината Марапи, што значи „Огнена планина“, висока 2.891 метри, се наоѓа на најзападниот остров Суматра во Индонезија.
Некои патеки за искачување беа повторно отворени дури минатиот јуни поради ерупциите на пепел од јануари до февруари.
Најсмртоносната ерупција на Марапи се случи во 1979 година, кога загинаа 60 луѓе.
Индонезискиот архипелаг се наоѓа на т.н. Пацифички огнен прстен, каде што спојувањето на континенталните плочи предизвикува висока вулканска и сеизмичка активност.