Од 1970 до 1990 година Швајцарците веројатно незаконски посвоиле илјадници странски деца, што сè уште ги одбележува нивните животи, објави Владата на оваа европска земја, пренесува Бета повикувајќи се на Франс прес.
Врз основа на наодите од новиот извештај што го нарача за оваа состојба, Владата објави барање за ревизија на меѓународните прописи за усвојување.
Веќе во 2020 година, по шокантните сведоштва на луѓе кои биле незаконски посвоени како деца, првиот извештај покажа недостаток на реакција на властите „и покрај претходните и јасни индиции за неправилности направени од посредници со цел да посвојат деца од Шри Ланка“.
Кантонална поддршка
Друга студија на Универзитетот за применети науки во Цирих (ZHAV) се фокусираше на другите десет земји на потекло на децата: Бангладеш, Бразил, Чиле, Гватемала, Индија, Колумбија, Јужна Кореја, Либан, Перу и Романија.
„Има индиции кои укажуваат и на постоење на незаконски практики во тие земји, трговија со деца, фалсификување документи и лажни индиции за потеклото“, се наведува во соопштението на Владата.
Истражувачите на ZHAV откриле 8.000 одобренија за влез во Швајцарија, 2.799 деца се од Индија, 2.122 од Колумбија, 1.222 од Бразил и 1.065 од Јужна Кореја.
Одобрението за влез во Швајцарија покажува дека неколку илјади деца биле посвоени со неправилности, признала Владата, која вели дека жали поради тоа и додава дека на кантоните им останува да ги поддржат посвоените во потрагата по нивното потекло.