Германскиот претседател Франк-Валтер Штајнмаер побара прошка од членовите на племето Мау Мау во Танзанија за „злосторствата што Германците им ги направија на нивните предци“, пренесоа агенциите, повикувајќи се на транскрипт од неговиот говор за време на посетата на музеј во градот Сонгеа на југот на таа источноафриканска земја.
На почетокот на 20 век, Танзанија била составен дел на германската Источна Африка, која доживеала едно од најкрвавите востанија во колонијалната историја помеѓу 1905 и 1907 година.
Експертите проценуваат дека меѓу 200.000 и 300.000 членови на домородното население биле брутално убиени за време на таканаречената буна Мау Мау, главно како резултат на систематското уништување на полиња и села од германските трупи во тоа време.
Штајнмаер во оваа прилика истакна дека Германија е подготвена да соработува со Танзанија на „заедничка обработка“ на минатото.
„Она што се случи овде е нашата заедничка историја – историјата на вашите предци и историјата на нашите предци во Германија“, рече Штајнмаер, ветувајќи дека „ќе ги земе овие приказни со себе во Германија, за повеќе луѓе во мојата земја да знаат за нив“.
„Сакам да ве уверам дека ние Германците со вас ќе бараме одговори на неодговорените прашања кои не ви даваат мир“, додаде тој.
Џон Мбано, чиј предок началникот Сонгеа Мбано беше убиен во бунтот на Маите Маите, рече дека ги поздравува зборовите на Штајнмаер.
„Плачеме со години, сега е време да престанеме да плачеме“, изјави 36-годишниот адвокат по телефон за АФП по средбата со германскиот претседател во Сонгеа.
Мбано додаде дека се надева на „добри односи меѓу Танзанија и Германија“.
Посетата на музејот во градот Сонгеа се случи на последниот ден од тридневната посета на Штајнмаер на Танзанија.
Германија е подготвена да соработува за „репатријација на културни добра и човечки останки“, рече Штајнмаер по разговорите со танзанскиот лидер Самиа Сулуху Хасан во Дар ес Салам.
Патувањето на Штајнмаер се совпаѓа со посетата на британскиот крал Чарлс III на Кенија, во која исто така доминираат разговори за последиците од колонијалното владеење на Лондон во оваа источноафриканска земја.