Пилулата за абортус „мифепристон“ ќе остане достапна во САД, но со значителни ограничувања, така што лекарите можат да им ја препишуваат на пациентите само по лична посета, одлучи федералниот апелационен суд доцна во средата, откако групите против абортусот законски побараа забрана.
Апелациониот суд со седиште во Њу Орлеанс минатиот петок ја одложи одлуката на судот во Тексас со која беше суспендирано одобрението на мифепристон од американската Администрација за храна и лекови (ФДА).
Но, апелациониот суд одби да блокира делови од одлуката на судијата во Тексас, што во пракса значи враќање на ограничувањата за мифепристон кои беа укинати во 2016 година.
Пресудата од минатиот петок, наводно, е во спротивност со одлуката на друг федерален судија, донесена истиот ден, која нареди ФДА да одржува неограничен пристап до мифепристон во најмалку 17 држави и главниот град на САД.
Владата на американскиот претседател Џо Бајден побара од тој судија да ја разјасни својата одлука во однос на онаа во Тексас.
Групите против абортус поднесоа четири тужби против FDA во ноември. Тие сметаат дека оваа агенција неправилно ја дозволила употребата на мифепристон во 2000 година и недоволно ја истражила безбедноста на овој третман кај девојчињата помлади од 18 години.
Повеќе од 300 биотехнолошки и фармацевтски компании во понеделникот потпишаа отворено писмо во кое повикуваат на поништување на одлуката во Тексас.
Авторите на отвореното писмо, лидерите на фармацевтските компании, напишаа дека минатонеделната одлука го поткопа авторитетот на ФДА и ги игнорираше децениските научни докази.
Во писмото се наведува дека одлуката на судијата ја става на ризик целата индустрија и претставува преседан за идно поткопување на одлуките на агенцијата за одобрување лекови, што исто така ќе ги обесхрабри инвестициите во истражувањето на нови третмани.