Американската армија набрзина доставува воена опрема на бојното поле и ги обучува украинските сили, во пресрет на големата пролетна офанзива против Русија, пишува бриселскиот портал Политико.
Секретарот за одбрана на Соединетите Американски Држави, Лојд Остин, по вчерашниот виртуелен состанок со мултинационалната украинска одбранбена контакт група, изјави дека „Украина нема повеќе време за губење“.
„Мора да ги исполниме нашите ветени обврски што е можно поскоро“, изјави Остин.
Тоа, рече тој, ги вклучува американските оклопни капацитети на бојното поле и обезбедување обука, резервни делови и поддршка на украинската војска за што поскоро користење на новите системи.
Загриженоста расте
Политико оценува дека како што наближува пролетта, американските власти се повеќе се загрижени за намалената испорака на муниција, противвоздушна одбрана и искусни војници.
Америка верува дека Киев и Москва непотребно продолжуваат да гинат во борбите за југоисточниот украински град Бахмут, кој, според САД, нема стратешко значење.
Пентагон сака, без оглед на стратегијата на Киев, украинските војници да го имаат оружјето што им е потребно за да продолжат да се борат.
Украинската армија има остар недостаток од основна муниција, вклучително и минофрлачки и артилериски гранати, велат тие.
Американските власти проценуваат дека околу 100.000 Украинци, вклучително и искусни војници, ги загубиле животите во војната што трае повеќе од една година.
Многу од тие загуби штотуку се случија во Бахмут, каде што двете страни имаат огромни жртви.
„Русите очигледно сакаат да напредуваат до границите на Доњецк сè до запад, а за да го направат тоа треба да го добијат Бахмут и патната мрежа што минува покрај него“, рече Дара Масикот, виш истражувач во Институтот РАНД.
Остин неодамна им рече на новинарите дека Бахмут е „повеќе симболична отколку стратешка и оперативна вредност“.
Подготовка за пролетна офанзива
Политико известува дека американските власти се повеќе фокусирани на подготовка на Украина за голема пролетна офанзива за повторно преземање територија, која очекуваат да започне до мај.
Стотици западни тенкови и оклопни возила, вклучително и за прв пат осум оклопни возила кои можат да им овозможат на војниците да ги преминат реките, се на пат кон Украина за офанзива.
Неименуван американски функционер рече дека пакетите со помош на САД во изминатите пет, шест месеци биле насочени кон она што и е потребно на Украина за контраофанзива.
Официјални лица на Пентагон во средата изјавија дека опремувањето и обуката на украинските сили ќе му помогнат на Киев да победи во војната – каде и кога ќе одлучат да го сторат тоа.
Началникот на Здружениот Генералштаб на американската армија, генерал Марк Мили, рече дека „има значителни тековни напори за зајакнување на украинската војска со опрема, муниција и обука во различни земји со цел да се одбрани Украина“.
Повеќе од 600 Украинци завршија петнеделна обука во Германија, вклучувајќи основни вештини како стрелање, медицинска обука и инструкции во комбинација со вооружени маневри во борбени возила Бредли и Страјкер.
Тие војници сега се на бојното поле, додека друга група од стотици борци е на истата програма за обука, додава бриселскиот портал.
Сите информации поврзани со најновите случувања со војната во Украина можете да ги прочитате ТУКА.