Мостот на Крим, кој го поврзува окупираниот полуостров со Русија, беше погоден вчера.
Службата за безбедност на Украина (СБУ) и поморските сили се одговорни за нападот, изјави неименуван извор во Украина за Си-Ен-Ен, пренесува Index.hr.
Мостот е стратешки важен бидејќи ја поврзува руската област Краснодар со полуостровот Крим, кој Русија илегално го припои на Украина во 2014 година, пишува Index.hr.
Мостот е клучна артерија за снабдување на Крим.
Низ него минуваат гориво и стоки за цивили, како и залихи за руската армија. Руските воени конвои редовно го користеа мостот за транспорт на возила, оружје и гориво.
Во октомври, мостот беше делумно уништен кога експлодираше цистерна со гориво и оштети голем дел од патот.
⚡️Следственный комитет РФ опубликовал кадры работы на Крымском мосту pic.twitter.com/B5o2146Vw3
— Донбасс Сегодня (@DonbassSegodnya) July 17, 2023
Важноста на Кримскиот мост
Покрај стратешкото значење, тој има и големо симболично значење за Русија, која изгради 19-километарски мост, најдолг во Европа, кој чинеше околу 3,7 милијарди долари.
Тоа беше физички израз на целта на Путин да ја освои Украина и засекогаш да ја врзе со Русија, пишува Index.hr.
На денот на отворањето, Путин водеше конвој преку мостот. За Украинците тој е потсетник на руската окупација.
Кремљ побрза да го обвини Киев за експлозијата на танкерот во октомври, за која Путин рече дека била саботажа во режија на украинските безбедносни служби.
Русија тогаш многу брзо го поправи мостот.
Како Русија го користи мостот?
Мостот е клучен за снабдување на Крим и транспорт на резерви за армијата.
Неможноста да се користи мостот за снабдување ќе ги ослаби руските сили во јужна Украина.
Како што пишува Index.hr, Русија ги користела кримските железници за снабдување на своите единици во Херсон, а неколку железнички центри во Крим и Херсон биле нападнати со украински ракети со долг дострел.
Железничкиот сообраќај преку мостот на Крим продолжува, но со доцнења, судејќи според снимките на социјалните мрежи и руските државни медиуми.
Украинската контраофанзива напредува во регионот Херсон, кој се наоѓа северно од Крим.
Главниот штаб на украинската армија минатата недела објави дека на југот на Украина, особено во правец на Запорожје и Херсон, руските сили ги насочуваат своите главни напори да го спречат натамошното напредување на украинските војници.
Во каква состојба е?
На социјалните мрежи е објавено видео од воз кој минува низ паралелен железнички мост на кој се гледа значителна штета на мостот на Крим.
„Железницата не е оштетена во ударот“, рече Владимир Константинов, претседател на Државниот совет на Република Крим, на својот канал Телеграм.
Руските државни медиуми РИА Новости и ТАСС јавуваат дека железничкиот сообраќај се уште е во застој.
Истакнатиот руски воен блогер Борис Рожин рече дека фериботите и големите амфибиски бродови ќе превезуваат автомобили што сега не можат да го преминат мостот, додавајќи дека очекува поправките да бараат време.
Што вели Кремљ?
Руската влада објави дека за нападот на мостот се одговорни два украински дрона, иако не дала докази за тоа тврдење, пренесува Index.hr.
Кремљ отвори официјална истрага за она што рускиот истражен комитет го нарекува „терористички чин извршен од специјалните служби на Украина“.
Путин бил информиран за нападот, изјави за новинарите портпаролот на Кремљ, Дмитриј Песков.
Што вели Украина?
Извор од Службата за безбедност на Украина (СБУ) за Си-Ен-Ен изјави дека нападот на мостот бил заедничка операција на СБУ и украинските поморски сили.
Изворот разговарал за Си-Ен-Ен под услов да остане анонимен, бидејќи не бил овластен да зборува јавно.
Претходно претставникот на украинското разузнавање Андриј Јусов изјави дека уништувањето на дел од мостот на Крим може да создаде логистички тешкотии за руските сили, кои го користат „како главна логистичка рута за транспорт на сили и ресурси длабоко на територијата на Украина“.
„Се разбира, какви било логистички проблеми се дополнителни компликации за окупаторите, што создава потенцијални предности за украинските одбранбени сили“, посочи Јусов.
Сите информации поврзани со најновите случувања со војната во Украина можете да ги прочитате ТУКА.