Ракометарките на Куманово остварија убедлива победа во рамките на 3то коло од домашната лига, откако на гостински терен вчера славеа против ЖРК Кузман Вардар Илинден со резултат 40:15.
Кумановки ја оправдаа фаворитската улога на мечот кога уште во првиот дел од средбата влегоа фуриозно и направија големо водство, кое на полувреме изнесуваше 7:23.
Избраничките на тренерот Симе Симевски не се штедеа ниту во второто полувреме, па лесно го добија противникот со финалните 40:15.
Скоро сите ракометарки на Куманово добија шанса на паркетот, а меѓу нив најефикасна со девет гола беше Мила Трајковиќ, со шест на листата стрелци се запиша Васка Глигоријадис, а со поен помалку и Александра Боризовска.
Кај домашниот состав со по пет погодоци носители на играта беа Ивана Блажевска и Ивона Русевска.
Ова е трета победа за составот на ЖРК Куманово и засега тоа ги сместува на втората позиција, зад екипата на Металург, со која делат ист број бодови.
Следниот меч Куманово го игра на домашен терен против составот на битолски Пелистер.