Просечната температура на Земјата вчера достигна нов неофицијален рекорд, 17,23 степени, што е веќе трет случај во оваа недела што е забележан како најтопол откако се прават мерењата.
Просечната температура на Земјата вчера достигна 17,23 степени целзиусови, со што го надмина рекордот од 17,18 степени постигнат во вторникот и повторен во средата, покажуваат наодите на мерниот систем „Climate Reanalyzer“ на Универзитетот во Мејн во САД, кој користи сателитски податоци и компјутерска симулација за мерење на температурата.
Просечната температура добиена на тој начин вклучува места со „опасна топлина“ како што е Џингсинг во Кина каде што беше речиси 43,3 степени целзиусови и, како што беше наведено, само невообичаено топли места како Антарктикот каде температурите во повеќето делови на континентот минатата недела беа 4,5 степени целзиусови над нормалата.
Американската Национална океанска и атмосферска администрација (NOAA) посочи дека треба да биде внимателна во врска со наодите од методот што го користел факултетот од Мејн, наведувајќи дека не може да ги потврди податоците кои делумно се изведени од компјутерски симулации.
„Иако НОАА не може да ја потврди методологијата или заклучоците од анализата на Универзитетот во Мејн, ние признаваме дека сме во топол период како резултат на климатските промени“, соопшти американската агенција.
Иако не се официјално признати, податоците од Мејн се сметаат за уште еден загрижувачки знак за климатските промени низ целата планета.
Некои климатски научници рекоа оваа недела дека не се изненадени од рекордните податоци.
Роберт Вотсон, научник и поранешен претседател на Меѓувладиниот панел на Обединетите нации за климатски промени, рече дека владите и приватниот сектор не се вистински посветени на прашањето за климатските промени, а не се ниту граѓаните.
„Тие бараат евтина енергија, евтина храна и не сакаат да ја платат вистинската цена на храната и енергијата“, рече Вотсон.