Украинскиот претседател Володимир Зеленски и министерот за одбрана Олексеј Резников објавија дека оствариле серија телефонски разговори со сојузниците на Киев за ситуацијата во Русија и украинската контраофанзива, по неуспешниот обид за бунт на руската воена организација „Вагнер“.
„Светот мора да изврши притисок врз Русија додека не се воспостави почитување на меѓународниот поредок“, рече Зеленски по телефонскиот разговор со американскиот претседател Џозеф Бајден, пренесе Ројтерс.
Зеленски рече дека му се заблагодарува на Бајден за неговата голема поддршка за Украина, особено за испораката на системот „Патриот“.
Тој на Твитер напиша дека му се заблагодарува на Бајден за најавената испорака на авиони Ф-16 во Украина.
Зеленски и Бајден разговараа и за проширувањето на украинските залихи на оружје со долг дострел.
„Благодарен сум за подготвеноста на Америка и народот на САД да застанат покрај Украина до целосно ослободување на сите наши територии во меѓународно признатите граници“, рече Зеленски.
Претседателот на Украина рече дека во телефонски разговор му се заблагодарил на канадскиот премиер Џастин Трудо за неговата посета на Киев и на сите Канаѓани за „континуираната поддршка за Украина“.
Зеленски изјави дека му пренел на Трудо дека руските сили, како што наведе, создале заканувачка ситуација во нуклеарната централа во Запорожје.
Зеленски оцени дека реакцијата на светот за уништувањето на хидроелектричната брана Каховка и обидот за уништување на браната во Криви Рог е недоволна.
„Партнерите мора да покажат силен одговор, особено на самитот на НАТО во Вилнус“, посочи Зеленски.
Украинскиот претседател рече дека тој и полскиот претседател Анджеј Дуда разговарале за неодамнешните настани во Русија и ситуацијата во врска со нуклеарната централа Запорожје, пренесе ТАС С.
„Разговаравме за последните настани во Русија и како тие можат да влијаат на напредокот на воените операции и ситуацијата во регионот“, напиша Зеленски во Телеграм.
Резников рече дека со американскиот секретар за одбрана Лојд Остин разговарал за украинската контраофанзива и следните чекори за зајакнување на украинските сили.
„Работите се движат во вистинска насока“, напиша Резников на Твитер.
Сите информации поврзани со најновите случувања со војната во Украина можете да ги прочитате ТУКА.