Pastello е креативна компанија со седиште во Куманово, а нејзините основачи за неа велат дека е „основана од страна на луѓе со иста идеја и визија, и луѓе со иста цел, а тоа е да произведуваат безвременски, уникатен и одржлив дизајн на осветлување“. И оваа компанија го нуди токму тоа, различни видови расветни тела и дизајни од прекрасно природно дрво. Тие даваат комплетно креативен осврт на секојдневните идеи за внесување на светлост во домот.
Како дојдовте до идејата за да правите уникатно осветлување ?
Тргнавме во потрага по уникатно осветлување, а наидовме само на стандардизирани увозни лустери и ламби. За наша среќа Македонија изобилува со високо квалитетно дрво. Составивме тим од искусни мајстори на кои им дадовме еден нов и модерен правец во начинот на производство. Нашата визија стана реалност. Добивме осветлување со карактер.
Од што најчесто црпите инспирација за дизајни ?
Инспирацијата и креативноста ја добиваме од сите страни, од разни природни и индустриски форми. На секој производ му посветуваме многу време и љубов. Секое парче рачно се обликува, составува и финишира се додека не се добие првично замислениот модел. Секоја ламба си има своја приказна. Секоја ламба си има и свое име. Секоја ламба си има свој карактерни особини и носи некоја емоција со себе. Една е нежна и едноставна, друга е остра, груба и упадлива. Една ќе внесе топла и пријатна атмсфера, друга ќе предизвика возбуда и забава во Вашиот дом.
Како настанува една ламба – од идеја до финален продукт ?
Можеби нашата приказна ќе Ви звучи познато, и ќе Ве потсети на приказната за Пинокио. На мајсторот Џепето му недостасувало дете па си направил дрвена кукла која што подоцна оживува. И кај нас, секое парче рачно се обликува, составува и финишира се додека не се добие првично замислениот модел. Нашите мајстори се секогаш подготвени да го обработат и да му дадат карактер. Како кај сите рачно изработени природни производи така и кај нашите може да се најдат разлики во текстурата и формата на дрвото, но со тоа само додаваме на нивната убавината и уникатност. Нашиот Џепето прави лустери и ламби кои што оживуваат кога Вие ке ги вклучите во струја.
Колку модели на ламби имате?
Моментално имаме околу 70 модели на осветлување од секаков вид, столни, подни, ѕидни ламби и лустери. Сите наши модели можат да се редизајнираат и изменат во форма, големина и боја. Ние ја цениме и креативноста на нашите клиенти па затоа нудиме модели врз основа на Ваша идеја или нацрт.
Каде ги изработувате ламбите и каде може да се видат?
Производствениот центар (или нашата инвентивна фабрика) се наоѓа во Куманово, а сите наши ламби се достапни онлајн на www.pastello.mk или во нашиот салон во Скопје. Во продолжение погледнете мал дел од производите на Pastello.