Вториот дел од договорените вакцини како донација од Србија денеска беа донесени на граничниот премин Табановце. Станува збор за пратка од 3.510 дози вакцини, што е вкупно 8.190 вакцини.
-Исклучително ми е драго да им помогнеме на колегите, да имаме подобрена здравствена состојба во регионот. Нашата цел е да продолжиме со помошта.- изјави Златибор Лончар, министер за здравство на Србија.
Оваа количина ќе биде доволна за сите здравствени работници кои во моментов имаат приоритет.
-Овој начин на солидарност која беше иницијатива на Зоран Заев и Александар Вучиќ се реализира и во втората фаза. Започнавме со имунизација на здравствените работници која се одвива одлично. Досега се вакцинирани 1300 задравствени работници, и со динамика 200 до 300 на ден продолжуваме понатаму.-рече Венко Филипче, министер за здравство на Република Македонија.
Србија досега има набавено околу 2 милиони вакцини, вакцинирани се милион жители дел од нив и ревакцинирани.
Искуството на Србија говори дека не треба да има опуштање по примање на првата доза, затоа што луѓето се опуштаат а со тоа доаѓа до повторен раст на заболени поради непочитување на мерките за заштита.
Вакцините пристигнаа со приватно возило од српска страна, беа прегледани од царински служби на Македонија и агенција за лекови, по што со комбе ќе бидат пренесени на клиниката за трансфузиологија во Скопје.
Првата пратка од Србија пристигна на 14 февруари, а на примопредавањето на донацијата од 4 680 вакцини присуствуваа премиерот Зоран Заев и српскиот претседател Александар Вучиќ.
Преговорите за донација на 8 000 вакцини од Србија почнаа на средината на јануари.
Текст: М. Ф. / фото: Никола Ивановски