Приближно 1,5 милиони турски граѓани со право на глас кои живеат во Германија можат да го дадат својот глас на парламентарните и претседателските избори одржани во Турција на 14 мај.
Членовите на најголемата турска заедница надвор од Турција можат да гласаат на изборите до 9 мај на 16 избирачки места одобрени од германското Министерство за надворешни работи.
Турските власти претходно предложија 26 избирачки места.
„Победата на опозицискиот кандидат ќе го отвори патот за враќање на демократијата во Турција“
Германскиот министер за земјоделство и член на партијата на зелените Џем Оездемир, кој и самиот по потекло е Турчин, смета дека претстојните избори во Турција се можност за промени во турската политика.
„Победата на опозицискиот кандидат Кемал Киличдароглу ќе го отвори патот за враќање на демократијата во Турција“, рече Оездемир.
Тој смета дека исходот од изборите во Турција е „отворен како никогаш досега во последните 20 години“.
Пратеникот во турскиот парламент и германски адвокат Мустафа Јенероглу ги повика турските гласачи во Германија да го дадат својот глас за „владеењето на правото и демократијата“.
Турците во Германија традиционално избираат конзервативни кандидати
Турските гласачи во Германија традиционално избираат конзервативни кандидати на изборите. На последните избори во 2018 година, актуелниот претседател Реџеп Таип Ердоган во Германија доби поддршка од 65 отсто од гласачите, додека во Турција таа поддршка со 53 отсто гласови беше значително помала.
Политиколози го објаснуваат тоа со фактот дека генерацијата на првите работници во Германија од Турција главно доаѓа од неразвиените и конзервативни делови на земјата, како што е Анадолија, и дека нивниот светоглед во голема мера го задржале припадниците на втората и третата генерација.
Најтешкиот изборен тест за Ердоган по две децении на власт
Пред пет години, се појавија тензии меѓу турската и германската влада поради забраната на турските политичари од јавните изборни собири во Германија, при што претседателот Ердоган ги обвини германските власти за блокирање на неговите напори во кампањата. Овој пат не се очекуваат вакви тензии.
Ердоган по 20 години на власт е пред најтешкиот изборен тест досега.
Неодамнешните анкети предвидуваат тесна трка меѓу актуелниот претседател и опозицискиот кандидат Кемал Киличдароглу.
Доколку ниту еден кандидат не освои повеќе од 50 отсто од гласовите на 14 мај, вториот круг од изборите ќе се одржи на 28 мај.