Во Националната установа Центар за култура „Трајко Прокопиев“ Куманово вечерва беше отворено првото издание на „Меѓународниот фестивал на прозата“.
Тема на првата фестивалска вечер беше „Женското писмо и Балканот“.
– Многу сме среќни што дојдовме од идеја до реализација на овој фестивал. Во првата фестивалска вечер учествуваат Јорданка Белева, Оливера Ќорвезироска и Лејла Каламујиќ, тоа се авторки со реноме во нивните држави и се надеваме на интересна фестивалска вечер. Во првата вечер ќе се зборува за женското писмо и жената на Балканот, така да очекувам голем интерес од публиката, изјави директорот на НУЦК „Трајко Прокопиев“, Сашо Тодоровски.
Како што појасни Тодоровски втората вечер ќе доминираат домашните автори и на истата седум до осум автори од Македонија ќе ги читаат своите прозни дела.
– Се надевам дека овој фестивал ќе биде еден од новите темели на Центарот за култура со кој Куманово и ние како Центар за култура ќе можеме да се гордееме, додаде тој.
Авторката Лејла Каламујиќ, која веќе има присуствувано на слични настани во целиот регион, вели дека темата е многу значајна и ваквите настани се многу важни.
– Книжевните фестивали станаа место за собирање и размена на искуства и познанства и најдобар увид во она што колегите и колешките во регионот го прават. Тука дојдов откако имам објавено три збирки кратки приказни и книга драма, драго ми е што вечерта е посветена на кратката проза, така да мислам дека и за тоа најмногу ќе разговараме за книжевноста која ја пишуваат жените и кратката книжевна форма, изјави авторката Каламујиќ.
Фестивалот го отвори секретарот на Општина Куманово Александар Гелевски, а истиот е под финансиско покровителство на Министерството за култура и локалната самоуправа.
Втората фестивалска вечер ќе се одржи вечерва со почеток од 20 часот.
Никола Ивановски