Руската војска префрла борбени авиони и хиперсонични ракети во регионот Калининград, блиску до земјите членки на Европската унија и НАТО.
Министерството за одбрана соопшти дека три авиони МиГ-31 со хиперсонични ракети Кинжал пристигнале во воздухопловната база Чкаловск како дел од „дополнителните стратешки мерки за одвраќање“ и ќе бидат распоредени на „24-часовна должност“.
На видеото кое го објави Министерството за одбрана се гледа како авионите пристигнуваат во базата, но без проектилите, кои најверојатно биле испорачани на друг начин.
Трансферот на ракетите доаѓа во време на зголемени тензии меѓу Западот и Русија поради инвазијата на Москва на Украина, која трае речиси шест месеци.
Калининград е руска енклава на балтичкиот брег, лоцирана меѓу Полска и Литванија, и е погодна за Москва да спроведе контрамерки против, како што тврдат, непријателската политика на НАТО.
Москва ја критикува испораката на западно оружје во Украина и ги обвинува САД и нивните сојузници дека го поттикнуваат конфликтот.
Russia has relocated MiG-31 fighters with “Dagger” missiles to the Chkalovsk airfield in the Kaliningrad region bordering Lithuania and Poland. pic.twitter.com/bA7JI891SW
— Iuliia Mendel (@IuliiaMendel) August 18, 2022
Русија ги зголеми своите сили во енклавата
За возврат, Русија ги засили воените сили во Калининград, вооружувајќи ги со најсовремени оружја, вклучувајќи ракети со прецизно наведување „Искандер“ и низа системи за противвоздушна одбрана.
Руската војска тврди дека Кинжал има домет до 2.000 километри и може да лета десет пати побрзо од брзината на звукот.
Рускиот претседател Владимир Путин, кој ја претстави ракетата во 2018 година, ја нарече „идеално оружје“ што е многу тешко да се пресретне.
Калининград се најде во центарот на вниманието во јуни, откако Литванија одлучи да го ограничи транзитот на стоки во областа преку нејзината територија, додека Русија најави одмазда за потегот.
Сепак, Европската унија оцени дека Литванија мора да дозволи транзит на руска стока преку нејзина територија, со исклучок на оружје.
Најзападниот руски регион беше дел од Германија до крајот на Втората светска војна, а беше припоен кон Русија на конференцијата во Потсдам во 1945 година.
Има околу еден милион жители, главно Руси, но и помал број Полјаци, Украинци и Литванци.
Не е познато колку руски војници се стационирани таму, а проценките се движат од 9.000 до 200.000.
Сите информации поврзани со најновите случувања со војната во Украина можете да ги прочитате ТУКА.