Кинеските власти побараа од сопствениците на автомобилите „Тесла“ да не ги паркираат своите возила во гаражите на државните институции.
Причината за ова необично барање се однесува на камерите на Тесла и можноста да се користат за шпионажа.
Извори запознати со ова прашање за „Ројтерс“ велат дека на вработените во две владини агенции им било наложено да не го паркираат својот „Тесла“ во објектите каде што работат.
Ова е втор извештај што се однесува на забраната за влез и паркирање на автомобили „Тесла“ во зградите на кинеската влада.
Во март беше објавена веста дека кинеската армија забрани влез на електрични автомобили од американско производство во воени објекти, повикувајќи се на загриженост за можноста за користење на нивните шпионски камери.
На тоа наскоро реагираше Илон Маск, кој ги демантираше тврдењата дека автомобилите на неговата компанија биле користени за шпионирање.
„Постои многу силен поттик што нè наведува да бидеме многу претпазливи за сите информации што ќе ги собереме“, изјави Маск за Си-Ен-Ен.
„Затоа што ако Тесла користеше автомобили за шпионирање во Кина или каде било во светот, ќе бевме затворени како компанија.
Иако многу нови возила имаат камери на отворено и затворено, кинеската војска е особено загрижена затоа што камерите на Тесла можат да се користат за постојано снимање и чување на снимки.
Војската го објасни својот страв велејќи дека овие снимки може да ги користат Соединетите држави.
Да се уверат кинеските владини агенции дека Тесла не шпионира ќе биде исклучително важно за американската компанија бидејќи Кина е најголемиот пазар на автомобили во светот, како и втор по големина пазар за Тесла со околу 30 проценти од глобалната продажба.