Новата анализа на генетскиот материјал собран од јануари до март 2020 година на пазар за морска храна во Вухан, Кина, откри животинска ДНК во примероци што веќе се знае дека се позитивни на САРС-КоВ-2, коронавирус што предизвикува Ковид-19.
Претставници на Светската здравствена организација изјавија дека значителна количина од таа ДНК се чини дека припаѓа на животни познати како ракунски кучиња, за кои се знаело дека се продаваат на пазарот, пренесува Си-Ен-Ен.
Врската со ракунските кучиња излезе на виделина откако кинеските истражувачи споделија необработени генетски секвенци земени од примероци од брисеви собрани од пазарот на почетокот на пандемијата.
Секвенците беа поставени на крајот на јануари 2023 година на страницата за споделување податоци на GISAID, но неодамна беа отстранети.
Меѓународен тим на истражувачи ги забележал и ги презел на понатамошно проучување, соопшти СЗО.
Новите наоди, кои сè уште не се објавени во јавноста, не одговараат на прашањето како започна пандемијата.
Тие не докажуваат дека ракунските кучиња биле заразени со САРС-КоВ-2, ниту пак докажуваат дека се животни кои први ги заразиле луѓето.
Сепак, според научниците кои ја воделе анализата, бидејќи вирусите не опстојуваат долго во околината надвор од нивните домаќини, наоѓањето толкав генетски материјал од вирусот измешан со генетски материјал од ракунски кучиња многу сугерира дека тие би можеле да бидат носители.
Обновен интерес за потеклото
Новите податоци доаѓаат откако републиканците во Конгресот отворија истраги за потеклото на пандемијата.
Претходните студии дадоа докази дека вирусот најверојатно се појавил природно на пазарот, но не можел да укаже на одредено потекло.
Некои американски агенции, вклучително и неодамнешната проценка на американското Министерство за енергетика, велат дека пандемијата најверојатно е резултат на протекување од лабораторија во Вухан.
На брифингот со новинарите во петокот, генералниот директор на СЗО, Тедрос Аданом Гебрејесус, рече дека организацијата првпат била информирана за секвенците во неделата.
„Штом станавме свесни за овие податоци, контактиравме со кинескиот ЦДЦ и ги повикавме да ги споделат со СЗО и меѓународната научна заедница за да може да се анализираат“, рече тој.
Обновен интерес за потеклото на Ковид-19 се појави откако американскиот претседател Џо Бајден објави дека ја проширува истрагата за избувнувањето, а разузнавачките агенции се приклонуваат кон теоријата дека вирусот истекол од лабораторија.
Гебрејесус ја повика Кина да биде потранспарентна
СЗО, исто така, ја свика својата научна советодавна група за потеклото на новите патогени, позната како SAGO, која го истражува потеклото на пандемијата.
Експертите на СЗО на вчерашниот брифинг рекоа дека податоците не се конечни.
„Овие податоци не даваат конечен одговор на прашањето како започна пандемијата, но секоја информација е важна за да се доближиме до тој одговор“, рече Гебрејесус.
Она што го докажуваат секвенците, рекоа претставниците на СЗО, е дека Кина има повеќе податоци кои би можеле да се однесуваат на потеклото на пандемијата што сè уште не ги споделила со остатокот од светот.
„Овие податоци можеше и требаше да се споделат пред три години“, рече генералниот директор на СЗО.
„Ја повикуваме Кина да биде транспарентна во споделувањето податоци и да ги спроведе потребните истраги и да ги сподели резултатите. Разбирањето како започна пандемијата останува морален и научен императив“, рече тој.
Сите информации поврзани со најновите случувања со војната во Украина можете да ги прочитате ТУКА.