НАТО потпиша договор од 1,1 милијарда евра за снабдување со артилериска муниција од 155 милиметри, соопшти Алијансата во вторникот, а дел од гранатите ќе ѝ бидат доставени на Украина по жалбите дека недостигот на муниција ги попречува нејзините воени напори.
„Војната во Украина стана битка за муниција“, изјави генералниот секретар на НАТО Јенс Столтенберг по церемонијата на потпишување во седиштето на алијансата во Брисел.
НАТО склучи договор во име на неколку сојузници кој или ќе ги проследи гранатите во Украина или ќе ги искористи за да ги надополни сопствените исцрпени резерви.
Купувањето на големо обезбедува пониски цени.
Со договорот најверојатно ќе се купат околу 220.000 парчиња артилериска муниција, а првите испораки се очекуваат на крајот на 2025 година, изјави претставник на НАТО за Ројтерс.
Муницијата ќе биде испорачана од францускиот производител на оружје Nexter и германскиот Junghans, изјави извор од наменската индустрија.