Брод со патници кои се враќале од свадба во северна Нигерија се преврте, при што загинаа повеќе од 100 луѓе, соопштија полицијата и локалното население, додека се интензивираше потрагата по преживеани.
Бродот се превртел на реката Нигер во округот Патеги во државата Квара, изјави портпаролот на полицијата Окасанми Ајаи.
„Досега имаме 103 загинати луѓе и повеќе од 100 спасени во бродската несреќа“, рече Ајаи.
„Потрагата и спасувањето сѐ уште е во тек, што значи дека бројот на жртви најверојатно ќе се зголеми.“
Жртвите, меѓу кои и жени и деца, се враќале од свадба во селото Егботи во државата Нигер, изјави жителот Усман Ибрахим.
Сѐ уште се трага по телата
Засега не е јасно дали има преживеани.
„Луѓето во чамецот требаше да ги однесат велосипедите во нивните различни заедници [откако ќе се симнат]. Бродот превезувал повеќе од 100 луѓе кога потонал“, изјави Ибрахим.
Многу жртви се удавија бидејќи несреќата се случила околу три часот наутро, а многумина дознале за тоа дури неколку часа подоцна, рече тој.
„До сега сѐ уште се трага по некои тела.“
Локалниот дневен весник Нигериан Трибјун објави дека патниците биле од селата Кпада, Егбу и Гакпан во Квара.
„Она што го слушаме од различни извори во областа е дека најмалку 64 луѓе дошле од едно село и околу 40 од друго село“, објави Ахмед Идрис од Ал Џезира, известувајќи од главниот град Абуџа.
Слични несреќи имало и во минатото
Тој додаде дека веќе се одржани погреби „за најмалку 60 лица кои загинаа во несреќата“.
„Она што досега го знаеме е дека повеќето од патниците не носеле никаква заштитна опрема како што се елеци за спасување“, рече Идрис, додавајќи дека спасувачките операции се во тек.
Во минатото имало слични несреќи во областа, која се наоѓа во близина на сливот на реките Нигер и Бенуе, двете најдолги реки во Африка.
Повеќето несреќи се резултат на премногу патници и употреба на лошо одржувани чамци.