Градоначалникот на Киев, Виталиј Кличко, објави на Телеграм дека имало експлозија во областа Подил во градот и дека се очекуваат уште ракети.
„Ракетите сѐ уште се движат кон Киев“, напиша Кличко на Телеграм.
Два проектили од киевските системи за противвоздушна одбрана беа истрелани во обид да се пресретнат руски ракети кои доаѓаат од југоисточниот дел на градот.
Како што јави известувачот на Гардијан од Киев, во следниот час се очекуваат нови напади.
Предупредувањето за воздушен напад беше објавено на денот кога делегацијата на африканските земји предводена од јужноафриканскиот претседател Кирил Рамафоса пристигна во Киев како дел од мировната мисија.
Африканските лидери дојдоа во Украина во мировна мисија, а планирана е и средба со рускиот претседател Владимир Путин.
Кирил Рамафоза, заедно со лидерите на Сенегал, Замбија, Коморските Острови и Египет, денеска треба да се сретне со украинскиот претседател Володимир Зеленски, а утре треба да отпатува за Санкт Петербург, Русија на разговори со Путин.
Африканските лидери би можеле да предложат серија „мерки за градење доверба“ за време на нивните првични напори да посредуваат во конфликтот меѓу Русија и Украина, се вели во нацрт-документот што го видел Ројтерс, објавија медиумите.
Тие мерки може да вклучуваат повлекување на руските трупи, отстранување на тактичкото нуклеарно оружје од Белорусија, суспензија на налогот за апсење на Меѓународниот кривичен суд против Путин и олеснување на санкциите.
Може да следи договор за прекин на воените дејствија, а потоа треба да следат преговори меѓу Русија и Западот, се наведува во документот.
Делегацијата ги посети масовните гробници во Буча надвор од Киев, кои беа привремено окупирани од руските трупи како дел од обидот да се заземе Киев што е можно поскоро.
Сите информации поврзани со најновите случувања со војната во Украина можете да ги прочитате ТУКА.