Калуѓерката Мери Маргарет Кројпер (80) од Лос Анџелес, оваа недела беше осудена на една година затвор за проневера на училишни пари, објави NY Post.
Оваа постара дама меѓу 2008 и 2018 година „извадила“ околу 900.000 долари од католичкото училиште во кое работела како директорка, кои потоа ги трошела како што сакала.
А најмногу од сè, според сите сметки, таа сакала да се коцка.
Откриено е дека често го посетувала Лас Вегас, но и други помалку познати дестинации за коцкање.
– Немам оправдување за моите постапки. Згрешив и го прекршив законот – изјави таа на суд.
Обвинителот Пунам Кумар на јавноста ѝ откри детали од случајот.
– Кога беше фатена, првото нешто што ни кажа е дека го направила тоа бидејќи смета дека не е фер свештениците да се подобро платени од калуѓерките. Иако годишната школарина е 6.000 долари, г-ѓа Кројпер често барала донации од родителите за подобрување на училиштето. Но, овие средства никогаш не биле искористени за подобрување на училиштето – тврди обвинителот и веднаш продолжува:
– Родителите го избраа ова училиште за своите деца поради католичките вредности и сега се чувствуваат измамени. Некои родители ми кажаа дека овој случај им ги однел децата од црквата и од Бога – изјави Кумар.
Меѓутоа, имало и родители кои барале на Марија да ѝ се прости сѐ.
– Една жена работи во образовниот систем 58 години. Таа е директорка на ова училиште во последните 28 години. Не велиме дека е добро тоа што го направила, но бараме судот да има предвид се што направила за заедницата во последните децении – стои во дописот што неколку родители го потпишале и го испратиле до судот.
Иако обвинителството бараше две години затвор, судот сепак одлучи да ја „преполови“ казната.
Сестра Кројпер мора да се јави на отслужување на казната на почетокот на јули.