Израелската армија утринава и во текот на изминатата ноќ изврши воздушни напади врз цели на Хезболах во јужен Либан.
Како што е соопштено, борбениот авион ја погодил воената зграда и другата инфраструктура на екстремистичката организација во пограничниот град Лабунех.
Рано утринава израелските одбранбени сили (ИДФ) објавија дека е погодена целта на Хезболах во Накура, од каде претходно беа истрелани проектили кон Израел.
Синоќа борбен авион го погоди воениот комплекс на Хезболах во Кфаршуба, а во вторникот набљудувачница во Киам, на југот на Либан, објавија израелските медиуми.
Во меѓувреме, Хезболах го објави името на својот член убиен во неодамнешниот израелски напад.
Со неговата смрт, бројот на убиени оперативци на таа проиранска организација се зголеми на 159, откако почнаа прекуграничните судири на 8 октомври.
Според Франс прес, загинале и 20 цивили, меѓу кои и тројца новинари.
На северот на Израел загинаа девет војници и тројца цивили, соопштија израелските власти.