Силни експлозии се слушнале во текот на ноќта во делови од југозападна Русија и во окупираниот Крим.
Руските власти соопштија дека пограничниот град Белгород, каде што во саботата беа убиени 25 лица, повторно е нападнат, како и Севастопол на Крим, каде беше соборен украински проектил.
Во последните денови се засили воздушната војна меѓу Русија и Украина.
Украинскиот претседател Володимир Зеленски изјави дека Русија лансирала околу 300 проектили и 200 дронови за пет дена.
Русија го изврши најголемиот воздушен напад од почетокот на војната кон крајот на минатата недела, при што загинаа повеќе од 40 луѓе.
Украинските сили одговорија со напад на Белгород, во кој беа повредени и повеќе од 100 луѓе.
Нови експлозии беа пријавени во Белгород во текот на ноќта во средата, а регионалниот гувернер изјави дека се уништени неколку беспилотни летала.
Во Севастопол, најголемиот град на украинскиот полуостров Крим под руска окупација, беше соборен проектил над пристаништето, објави на Телеграм прорускиот гувернер Михаил Развозаев. Нема извештаи за жртви или материјална штета.
Во вторникот руски проектили ги погодија најголемите градови во Украина, вклучувајќи ги Харков и Киев, при што загинаа најмалку пет лица, а десетици беа ранети, соопштија локалните власти.
Забележано е и дека едно лице загинало во украинскиот напад на Белгород.
Овие напади следеа откако рускиот претседател Владимир Путин вети дека ќе ги засили нападите како одговор на неодамнешните напади во Украина, пренесува Index.hr.
Во своето доцна вечерно обраќање во вторникот, Володимир Зеленски рече дека Русија истрела „речиси сто проектили од различни типови“ тој ден.
Тие, рече тој, „беа специјално избрани од непријателот за да предизвикаат што е можно поголема штета“.
Зборувајќи подоцна за Би-Би-Си, украинската амбасадорка во САД, Оксана Маркарова, рече дека неодамнешното руско бомбардирање „не беше нешто што беше изненадување“ – туку дека за да победи во војната, на Украина ѝ треба повеќе оружје за да одговори и „јасна порака до Русија да престане“.
Сите информации поврзани со најновите случувања со војната во Украина можете да ги прочитате ТУКА.