На светските пазари минатата недела цените на нафтата благо паднаа, по две недели раст, бидејќи растот на западните економии забавува, што ќе ја ослаби побарувачката за „црното злато“.
Цената на барелот на лондонскиот пазар минатата недела се лизна за 1,1 отсто, на 76,13 долари, додека на американскиот пазар барелот падна за 1,3 отсто, на 71,74 долари.
Минатата недела цените на нафтата се движеа во тесен опсег бидејќи нема премногу причини ниту за нивниот раст ниту за значителен пад.
Трговците на крајот на неделата беа охрабрени од „зеленото светло“ дадено од американскиот Конгрес за законот кој овозможува зголемување на задолжувањето на државата, односно натамошно правилно сервисирање на федералните финансиски обврски.
Цените беа поддржани и од сигналите на американската централна банка дека каматните стапки може да останат непроменети во јуни додека не се види како ќе се движат инфлацијата и економијата во наредните месеци.
Како резултат на тоа, доларот ослабе, што ја зајакна куповната моќ на оние кои купуваат нафта во други валути.
Сепак, цените сѐ уште се под притисок бидејќи не се знае колку ќе забави растот на западните економии и дали ќе се избегне рецесија, имајќи предвид дека поради високата инфлација централните банки на западните земји најверојатно ќе продолжат да ги зголемуваат каматните стапки.
Цените во црвено од почетокот на годината
Минатонеделното тргување беше одбележано со шпекулации за тоа што ќе се одлучува на состанокот на Организацијата на земји извознички на нафта (ОПЕК) и нејзините сојузници.
Во април, ОПЕК + неочекувано одлучи да го намали производството за 1,16 милиони барели дневно за да ги поддржи цените.
Сепак, овој потег во меѓувреме беше надминат од други фактори, па цените повторно паднаа под нивото на кое беа пред намалувањето на производството.
Во неделата лидерите на групата ОПЕК + одлучија да го задржат производството на постојното ниво, но Саудиска Арабија најави доброволно намалување на производството за еден милион барели дневно, што може да ги поддржи цените на „црното злато“ во наредните денови.
Споредено со почетокот на годината, цените на нафтата во моментов се во значителна негатива, околу 10 отсто.