Царинските службеници на Табановце во текот на минатиот викенд запленија околу 20 илјади евра кои македонски државјанин имал намера нелегално да ги внесе во државата.
Непријавените девизи, како што велат од Царинската управа, се откриени при детална контрола на возилото со кое лицето патувало.
– Имено, на 22 октомври, македонскиот државјанин кој управувал со возило со шведски регистарски таблички, на влез во државава изјавил дека со себе има само околу 10 илјади евра, иако носел вкупно 29.950 евра. Поради постоење на сомнеж, царинските службеници извршиле детална контрола и притоа зад возачкиот штитник за сонце и во просторот помеѓу предните седишта откриле поголем износ на девизи, коишто лицето не ги пријавило и за истите не поседувало документ за потекло, стои во соопштението.
Согласно Законот за девизно работење на патникот му се вратени 10 илјади евра, а останатите 19.950 евра биле привремено задржани и согласно регулативата ќе бидат предадени во Народна банка.
– Против лицето е поднесена пријава за сторен девизен прекршок, велат од ЦУ.
Царинската управа известува дека при секој влез во државата, патниците можат слободно да внесат девизи во износ до 10.000 евра по лице.
Доколку се внесуваат ефективни странски пари – девизи над 10.000 евра, лицата се задолжени истите да ги пријават на царинскиот орган.
Никола Ивановски