Британското Министерство за одбрана во петокот објави дека ќе инсталира ласери на воени бродови за соборување дронови од 2027 година, пет години порано од очекуваното.
Министерството објави дека ласерите ќе можат да пукаат во која било цел на небото по цена од околу 10 фунти (11,7 евра) по истрел и ќе бидат толку прецизни што ќе можат да погодат паричка од далечина од еден километар.
Претходно се очекуваше дека ласерите DragonFire ќе бидат оперативни дури од 2032 година, а тоа е долгорочна и евтина алтернатива за одбрана од дронови.
Беспилотните летала можат да уништат високотехнолошки системи за оружје, а моментално се скапи за соборување.
На пример, ракетите Sea Viper што Обединетото Кралство моментално ги користи за соборување на беспилотни летала на Хути во Црвеното Море чинат по 1 милион фунти.
„Во сè поопасен свет, нашиот пристап кон набавките исто така се менува. Нашите сеопфатни реформи ќе ја забрзаат испораката на најновата опрема и оружје за нашите вооружени сили“, рече британскиот министер за одбрана Грант Шапс во изјавата за ласерот.
„DragonFire го прикажува најдоброто од Велика Британија како лидер во воената технологија и нема да одложиме да го ставиме во рацете на нашата војска за да се спротивставиме на заканите со кои се соочуваме“.