Американскиот државен секретар Ентони Блинкен денеска разговараше за широк спектар на билатерални прашања со саудискиот престолонаследник Мохамед бин Салман во „отворен, искрен“ разговор, изјави американски претставник за Ројтерс.
Односите меѓу двете земји долго време се затегнати поради состојбата со човековите права во Саудиска Арабија и несогласувањата околу политиката на Вашингтон кон Иран и политиката на Ријад кон Израел, пренесува Ројтерс.
Блинкен, кој пристигна во Саудиска Арабија во вторникот, и принцот престолонаследник, де факто владетел на кралството, разговараа за многу теми во текот на час и четириесетминутната средба, вклучувајќи ги односите со Израел, конфликтот во Јемен, немирите во Судан, како и како почитување на човековите права, рече функционерот кој не сакаше да го открие својот идентитет.
„Постои добар степен на зближување во однос на потенцијалните иницијативи каде што споделуваме исти интереси, а истовремено препознаваме одредени разлики“, рече американскиот функционер.
Во голем дел од дискусијата се очекуваше да доминира можната нормализација на односите меѓу Саудиска Арабија и Израел, иако официјалните лица претходно ја намалија веројатноста за каков било непосреден или голем напредок по ова прашање.
Според овој извор, Блинкен и Мохамед бин Салман „разговарале за потенцијалот за нормализација на односите со Израел и се согласиле да го продолжат дијалогот за ова прашање“.
Разговори за Јемен и Судан
Ријад не го следеше водството на Обединетите Арапски Емирати и Бахреин во воспоставувањето односи со Израел во 2020 година под претходната американска администрација на Доналд Трамп, велејќи дека прво треба да се решат целите на палестинската државност.
Во април, Саудиска Арабија ги обнови односите со Иран, регионалниот ривал и главен непријател на Израел.
Развивањето на цивилна нуклеарна програма е еден од условите на Ријад за нормализирање на односите со Израел, изјави извор запознаен со разговорите, потврдувајќи го извештајот на Њујорк Тајмс во март, иако саудиските и американските власти јавно не го потврдија тоа.
Престолонаследникот и Блинкен разговараа и за Јемен и потенцијалните начини за решавање на преостанатите прашања, при што Блинкен му се заблагодари на Ријад за неговите напори да постигне прекин на огнот во Судан и да помогне во евакуацијата на американските граѓани.
Според американскиот функционер, Блинкен ги покренал и прашањата за човековите права во Саудиска Арабија, како нашироко, така и во врска со поединечни случаи, но не кажа кои, според Ројтерс.