Австралискиот премиер Ентони Албанес денеска изјави дека самитот на безбедносниот пакт „Квад“ во Сиднеј следната недела нема да се одржи без американскиот претседател Џозеф Бајден, кој го одложи своето патување во Австралија поради преговорите со Конгресот за лимитот на американскиот федерален долг.
По телефонскиот разговор со Бајден претходно во текот на денот, Албанец најави дека ќе го откаже самитот Quad закажан за 24 мај.
Тој рече дека лидерите на Австралија, САД, Индија и Јапонија ќе се сретнат на самитот на Г7 во Јапонија овој викенд, откако Бајден го откажа патувањето во Сиднеј што требаше да биде втора станица на неговата азиска турнеја, пренесува Ројтерс.
Бајден ќе присуствува на тридневниот самит на лидерите на Г7, кој започнува во петок во Хирошима, а во недела ќе се врати во САД. Тој претходно требаше да ја посети Папуа Нова Гвинеја, пред да отпатува за Австралија, на состанок на земјите од Квад.
„Средбата на Квад нема да се одржи во Сиднеј следната недела. Ние, сепак, ќе разговараме меѓу лидерите на Quad во Јапонија“, рече Албанес на прес-конференцијата.
Билатералните разговори во Сиднеј со индискиот премиер Нарендра Моди би можеле да продолжат следната недела, рече Албанес.
Тој не прецизираше дали јапонскиот премиер Фумио Кишида сепак ќе го посети Сиднеј следната недела.
Quad е неформална група која се залага за отворен Индо-Пацифик. Кина го гледа овој сојуз како обид да се спротивстави на нејзиното растечко влијание во регионот.
Индија и Австралија не се дел од групата на напредни економии Г7, Велика Британија, Канада, Франција, Германија, Италија, Јапонија и САД, но тие беа поканети да присуствуваат на самитот во Јапонија, пренесува Танјуг.