Стотици Британци се затворени на француски крузер откако еден патник почина од сомнителен норовирус, додека десетици други покажаа симптоми.
Француските власти ставија во карантин повеќе од 1.700 патници и членови на екипажот на крузер кој се закотви во Бордо во среда.
Бродот „Амбасадор крузер лајн“, со повеќето од 1.233 патници на бродот од Велика Британија или Ирска, пристигна во западното француско пристаниште Бордо во вторник.
90-годишен британски патник почина, додека околу 50 лица покажаа симптоми на норовирусот, соопштија здравствените власти, пишува „Дејлимејл“.
Норовирусот е форма на гастроентеритис што предизвикува повраќање и дијареја и е многу заразен.
Крузерот, кој исплови од Шетландските Острови на 6 мај, претходно застана во Белфаст во Северна Ирска, Ливерпул во Велика Британија и Брест во Франција пред да пристигне во Бордо, каде што требаше да го продолжи своето патување кон Шпанија.
Во соопштение објавено на социјалните медиуми, „Амбасадор Круз Лајн“ ја потврди епидемијата и додаде дека „секоја болест на своите бродови ја сфаќа исклучително сериозно“.
„Веднаш беа воведени засилени санитарни и превентивни протоколи низ целиот брод во согласност со утврдените процедури за јавно здравје по првите пријави за болест. Сеопфатните здравствени и безбедносни мерки воведени на бродот вклучуваат зголемено чистење и дезинфекција на јавните површини, контролирано послужување во одредени ресторани, како и постојани упатства до патниците во врска со хигиената на рацете“, наведоа тие.
Во соопштението се додава дека медицинскиот персонал се грижи за патниците и членовите на екипажот, додека сите екскурзии на брегот се откажани и на сите патници им е наредено да останат на бродот.
Ова доаѓа во време кога меѓународната заедница се справува со епидемијата на хантавирус поврзана со луксузниот крузер MV Hondius, каде што починаа три лица, а вкупно се потврдени девет случаи.
Британски турист кој се качил на авион со жена која подоцна починала од хантавирус бил приведен во италијански бар и ставен во болнички карантин еден месец – и покрај тоа што не покажал симптоми и бил негативен на тестот, беше откриено во среда.
Туристот и неговиот придружник, кој дури и не бил на тој лет, биле приведени пред барот во вторник вечерта и однесени во болницата Сако во Милано.
Двајцата се во карантин до 6 јуни, со што завршил 42-дневниот период на изолација што го бара Министерството за здравство.
Британскиот државјанин, маж во шеесеттите години, патувал со истиот лет на „Ерлинк“ од Света Елена до Јоханесбург како патник од крузерот „МВ Хондиус“, 69-годишната Миријам Шилперорд, која подоцна починала, како и друго лице кое подоцна било позитивно на вирусот.
Миријам била сопруга на холандскиот орнитолог Лео Шилперорд (70), за кој се верува дека е „нултиот пациент“.
Двојката се разболела откако посетила депонија во Аргентина, каде што набљудувале птици.
Британските власти ги информирале италијанските власти за британскиот турист, кој пред да пристигне во Милано престојувал во неколку земји, вклучувајќи го и Амстердам, каде што неговите патни планови одеднаш биле прекинати.
Бидејќи немал приватен смештај и престојувал во пансион, ќе мора да го помине целиот период на карантин во една соба од одделот за заразни болести на болницата.
Во исто време, официјалните лица открија дека 10 Британци од островите во Јужниот Атлантик поврзани со епидемијата на крузерот ќе бидат префрлени со авион во Велика Британија доколку ја развијат болеста.
Групата, која ја сочинуваат жители на британските прекуокеански територии Света Елена и островот Вознесение, ќе биде префрлена во Велика Британија за да се самоизолира таму.
Сите вклучени се британски државјани, а меѓу нив се и луѓето што го напуштиле крузерот на Сент Јелена, како и медицинскиот персонал што бил во контакт со нив.