Италијанскиот министер за одбрана во среда објави дека Италија ќе распореди два брода за противмински мерки поблиску до Персискиот Залив, за да можат брзо да интервенираат и да го обезбедат Ормускиот теснец кога условите ќе дозволат.
„Како чисто превентивна мерка и имајќи го предвид времето потребно за трансфер и прераспределба на ресурсите, планираме да распоредиме два брода за противмински мерки релативно поблиску до Ормускиот теснец“, објасни министерот Гвидо Кросето во парламентот.
Овие два брода ќе бидат распоредени „првично во Источниот Медитеран, а потоа во Црвеното Море, како дел од тековните мисии „Медитеранео Сикуро“ („Безбеден Медитеран“) и „Аспидес““, прецизираше министерот.
Кросето нагласи дека предуслов за какво било воено распоредување нема да биде „привремено“ примирје, кое моментално е во сила меѓу Иран и САД, „туку вистинско, веродостојно и стабилно примирје или уште подобро, траен мир“.
Тој, исто така, посочи дека секоја мисија во Ормутскиот теснец може да се одвива само со претходно одобрение од членовите на парламентот.
Во средината на април, неколку земји, кои не се директно вклучени во конфликтот предизвикан од нападите на САД и Израел врз Иран на 28 февруари, изразија подготвеност да воспостават „неутрална мисија“ за обезбедување на теснецот.
Ова беше постигнато на конференцијата со која претседаваа францускиот претседател Емануел Макрон и британскиот премиер Кир Стармер во Париз, а во неа учествуваше и Италија.
Целта е да се „следат и обезбедат трговски бродови што минуваат низ Заливот“, рече Макрон, додека Стармер го опиша потегот како „мирна, одбранбена“ сила.
„Денес, 40 земји размислуваат да придонесат за тоа Ормутскиот теснец да стане слободен и пловен штом условите дозволат. Дури 24 од нив веќе изразија подготвеност во принцип да учествуваат со високо специјализирани ресурси, корисни, на пример, за отстранување на мини од морската област“, објасни италијанскиот министер за одбрана.
„Доколку преовлада мирот, на сите единици на вклучените сојузнички нации ќе им треба речиси еден месец пловење за да стигнат до Персискиот Залив. Затоа се организираме за да се приближиме до оваа област, а воедно да останеме на безбедно растојание“, објасни тој пред парламентарците.
Гвидо Кросето, исто така, рече дека учеството на Кина е „фундаментално“ за „постигнување решение“, особено во рамките на Обединетите нации.
„Кина е првата што е погодена од она што се случува во Хормуз, па затоа треба да има барем еднаков, ако не и поголем интерес од нас за наоѓање решение“, рече тој.
Францускиот претседател Макрон во вторник најави претстојна „иницијатива во Обединетите нации“ чија цел е да предложи „рамка“ за таква идна мисија за обезбедување на Ормузскиот теснец, која треба да започне откако Иран и САД ќе се согласат да ги укинат своите блокади, со, се разбира, консултации со овие две земји.