Речиси 80 девојчиња во северен Авганистан завршиле во болница откако биле отруени додека биле на часови.
Девојчињата биле отруени во два одвоени напади на основни училишта за време на викендот, соопштија властите.
Според нив, тој што ги организирал нападите имал „лични причини“, но не е објаснето кој и зошто некој ги нападнал невините деца.
Се верува дека ова е првпат да се случи таков напад откако талибанците дојдоа на власт во август 2021 година и почнаа да ги сузбиваат правата и слободите на авганистанските жени и девојки.
На девојчињата им е забрането образование по шесто одделение, вклучително и факултетот, а на жените им е забрането повеќето работни места и јавни места.
Труењата се случија во областа Сангчарак, рече Мохамад Рахмани, кој раководи со провинцискиот оддел за образование.
Тој рече дека 60 ученички биле отруени во училиштето Насван-е-Кабод Ааб, а 17 други се затруле во училиштето Насван-е-Фајзабад.
„Училиштата се блиску едно до друго. Ученичките се пренесени во болница и сега се добро“, рече Рахмани.
Истрагата е во тек, а првичните наоди покажуваат дека осомничениот платил трето лице за да ги изврши нападите, рече Рахмани.
Тој не даде информации за тоа како се отруле девојчињата, ниту за природата на повредите.
Рахмани не ја кажа нивната возраст, но рече дека се од прво до шесто одделение.