Украинскиот претседател Володимир Зеленски изјави дека не бил информиран од Белата куќа за протекувањето на високо доверливи документи на американските разузнавачки служби, кои минатиот месец беа во фокусот на вниманието на светската јавност.
„Не добив информации однапред од Белата куќа или од Пентагон“, рече Зеленски во интервју за Вашингтон пост објавено во вторник.
„Тоа е неисплатливо за нас. Тоа не е од корист за угледот на Белата куќа, а верувам дека не е од корист ниту за угледот на Соединетите Американски Држави“, додаде украинскиот претседател и протекувањето на податоците го опиша како „шоу што ѝ помогна на Русија“.
„За нас, сè што однапред го информира нашиот непријател на еден или друг начин е дефинитивно минус“, рече Зеленски.
Тој рече дека нема ниту да ги потврди ниту да ги негира објавените информации за да избегне сугерирање дека документите се вистински.
„Ве молам, престанете да си играте со мене. Јас сум претседател на земја во војна“, рече Зеленски во интервјуто.
Џек Тешеира, член на Воздухопловната национална гарда на Масачусетс, беше обвинет за обелоденување на податоците, а украинскиот министер за одбрана Олексеј Резников на 12 април рече дека податоците содржат мешавина од вистинити и лажни информации за војската на неговата земја.
Како одговор на коментарите на Зеленски, портпаролот на Советот за национална безбедност на Белата куќа рече: „Ние сме во постојана комуникација со нашите украински колеги за низа прашања, вклучително и неовластено откривање информации, но нема да навлегуваме во детали за тие приватни дискусии“.
Портпаролот на Пентагон, Патрик Рајдер, рече дека американскиот министер за одбрана Лојд Остин разговарал со голем број сојузници, вклучувајќи го и Резников, за ова прашање.
Сите информации поврзани со најновите случувања со војната во Украина можете да ги прочитате ТУКА.